Cebu City Medical Center hapit na magamit

Nindot ni nga balita kanatong mga kabus nga lumolupyo dinhi sa Dakbayan sa Sugbo.

Hapit na gyud diay mahuman ang unang tulo ka andana sa bag-ong Cebu City Medical Center (CCMC) building ug posible nga magamit na kini basin sa sunod buwan.

Gitug-an kini sa Deputy Mayor for Hospital and Health nga si Konsehal Maryann Delos Santos nga maoy gitahasan ni Mayor Tomas Osmeña pagsuperbisar sa nagpadayong construction sa bag-ong ospital.

Sagdi lang, isip reporter sa Cebu City Hall, personal nako nga bisitahan ang bag-ong ospital karong semanaha ug hatagan ko kamo og kasayuran kun unsa ang akong makita didto.

Mananghid usa ko sa kontraktor nga mosulod.

Apan matud ni Konsehal Delos Santos nga nagsugod na gani diay sa pagpamintal ang kontraktor sa mga interior nga bahin sa building.

Sigurado ko nga hangpon gyud sa katawhan ang kahumanan sa proyekto kay ang sama kanako nga kabus, maglisud gyud tawon sa pagpatambal sa mga pribadong ospital.

Hangyuon gyud nako siya nga tutokan niya kining maong proyekto aron nga dili sab maglangaylangay ang kontraktor sa iyang trabaho.

* * *

Bisan og nanghatag ang siyudad og cash assistance sa mga senior citizens diha sa kabarangayan kaniadtong Sabado, apan daghan gihapon ang mipili nga adto sa City Hall sila mokobra.

Mora’g tan-aw nako, doble na kini nga trabaho sa atong mga paymaster. Nganong dili man gyud sila mokobra diha sa barangay?

Maayo tingali nga usbon na ang pamaagi nga tibuok adlaw gyud ang pagpanghatag sa cash assistance diha sa barangay, unya ang dili makakobra, dili na gyud hatagan pa.

Ambot og mosugot ba kaha niini si Konsehal Eugenio Gabuya Jr. nga maoy tsirman sa Committee on Social Services sa City Council.

Tiaw mo, gisugyot man gani ni Gabuya nga kadtong mga senior citizens nga narehistro ug nakabotar sa 2013 elections, tugotan na nga makakobra og cash assistance gikan  sa siyudad.

Ang gisugyot nga ordinansahon ni Gabuya, anaa na sa Committee on Laws nga gipangulohan ni Konsehal Sisinio Andales.

Tan-aw nako nga maaprobahan gyud ni nga tinguha kay majority man ang mga konsehal nga alyado sa BOPK diha sa konseho.

Apan kinsa man sab gud nga konsehal ang mosupak niining maong tinguha?