Mga Gullas gusto’g tukma

Dili tanang pagdayeg nga ang sulaton sa usa ka kolumnista makahatag og eksaktong kalipay sa gipahinungdan.

Labi nag nahisama kini sa usa ka apa, diin bisag puno na, gisudlan lang gihapog sorbete, aw… miawas, ug anugon lang ang sobrang nangahulog sa yuta.

Isip usa ka writer, sama sa pintor, kon may makapahinuklog talan-awon nga makit-an o madunggan, motukar gyod dayon ang biga sa pagpanulat sa maong subject nga gihimong modelo, diin sa nagtubod nga imahinasiyon, mangguho ang flowery words ug background nga maoy makapasamot pagpatahom sa dugokan nga sulaton o pintalon.

Akong higalang Casino Operations Manager, Boss Fil Domugho, subscriber ning TF Banat News ug tigsunod ning akong kolum, usa ka higayon, nakig-istorya nako.

Niya pa, ay: “Ah, beliba nako nimo, Jav, uy! Grabe man kaayo imong pagdayeg sa mga Gullas diha sa imong kolum.”

Unya mitingsi ug mitiaw: “Pila man gyoy gibayad nila diha nimo?”

Haskang dalia nakong nakatubag: “Bisan usa ka diyot, wa gyod koy nadawat, Boss Fil.

Ingon ana lang gyod ang akong estilo sa pagsulat sa higayon makakitag mga tawo nga makapa-touched sa dughan ang ilang maayong binuhatan.

Dili ra man sila ang gidayeg nako. Dili ba, hasta gani ikaw, ako mang gidayeg?”

Ug gitug-anan ko siya nga dinhay panahon nga gipatawag kong Sir Dodong Gullas, kay aduna lang siyay gamayng ikomentariyo bahin niadtong napatik kong artikulo nga nakadayeg sa iyang pagpahigayon og mass wedding nga libre atol sa iyang mga birthdays.

Iya kong gisultian, nga wala na kuno kini. Iya nang gihunong ug medical mission maoy iyang gipuli. Nangayo dayon kog ‘sorry’, uy!

Usab, ako pod si Boss Fil gisuginlan, nga gipadad-an kog sulat ni Talisay City Mayor Eduardo ‘Eddiegul’ Gullas nga mipasalamat nako bahin sa sobra nakong pagdayeg nilang duhang Samsam diha sa ilang pagpanerbisyo sa katawhan.

Pero, adunay laing gisulti ang sulat. Matod pa, ay: “Sir Javier, actually, di gyod ko worthy in full sa imong gisulat nga artikulo. Mora kog nahugno, uy!

Didto misamot ang paghanga ko sa mga Gullas. Nahimo gyong kabahin sa ilang kinaiya ang ka-honest sa kaugalingon ug kamapahiubsanon.

Maoy ilang gusto ang unsa ray tukma, husto ug tinuod. Pagkanindot nga mithi! Kapanamina.