Listahan

Nagkanipis na ang listahan ni Presidente Rodrigo Duterte sa mga opisyal nga giingon nga nalambigit sa negosyo sa drugas dinhi sa nasud.

Basi sa awahing listahan nga gibulgar ni Duterte niadtong Huwebes sa gabii didto sa Davao City, duna nalay kapin sa 40 ka mga politiko. Mas minus ni kay sa unang listahan nga iyang gipublikar niadtong bag-o pa siyang milingkod sa pwesto.

Tingali usa sa mga hinungdan mao nga ang uban nga diha sa iyang lista nadakpan na ug ang uban napatay.

Duna say uban nga natangtang sa way pagpasabot unsay hinungdan. Apan dunay nagpabilin pa gihapon sa lista hangtud ron nga wala say kaso nga napasaka ang gobyerno.

Base sa giingon nga validated list nga gipublikar ni Duterte niadtong Huwebes, duha ka mga politiko sa Sugbo ang naapil.

Sila si Daanbantayan Mayor Vicente Loot nga daan nang nalakip kaniadto ug si San Fernando Vice Mayor Fralz Sabalones, igsuon sa miangkong drug lord nga si Franz Sabalones.

Si Loot ug Sabalones pulos wala na igkita sa ilang mga buhatan. Si Sabalones nag-leave hangtud mahuman iyang termino karong Hunyo. Si Loot sab gipadagan ang lungsod gikan sa wala matino nga lugar.

Atol sa iyang pagbasa sa lista miingon si Duterte nga gipasakaan na og mga kasong administratiba atubangan sa DILG ang ubang mga nalambigit, usa nila si Loot.

Pero husto si Loot sa iyang pangutana, kun tinuod nga dunay ebidensiya ang kapolisan batok niya nganong administratiba ug dili kriminal ang kaso nga gisang-at?

Nagpasabot ba ni nga wala gyud silay ebidensiya ug pulos lang pagtahap ang gihuptan sa kapolisan?

Dili sab tinuod makiangayon nga gibulgar na ang ilang mga pangalan apan wala pa diay ebidensiya batok nila.

Sa pikas bahin, angayan tingali nga ipasabot sab sa presidente unsay hinungdan  sa pagkatangtang sa pangalan sa uban diha sa iyang listahan kaniadto.

Pananglitan si kanhi bise mayor Mike Rama. Sulod sa labing minus duha ka higayon kaniadto ginganlan ni Duterte si Rama nga nalambigit sa illegal nga drugas. Apan takulahaw lang nga nahanaw ang iyang pangalan sa listahan.

Tingali katungod sa mga Sugboanon nga masayran gitumo-tumoan ba lang si Rama sa maong pasangil kaniadto o niundang na siya sa iyang kalambigitan?

Katungod sab ni Rama nga malimpiyo sa hingpit ang iyang pangalan nga way bisan dyutay nga lama sa katahap nga magpabilin.