EDITORYAL - Plaka makapakgang sa krimen?

Miani og daghang mga pagsaway gikan sa mga netizens ug sa publiko kining gipasar nga balaud nga nagmando nga kinahanglang padak-an pa gyud ang kasamtangang plaka sa mga motorsiklo aron mapakgang ang krimen.

Ang Motorcycle Crime Prevention Act nga bag-ohay lang gipirmahan ni Presidente Duterte ug hingpit nga nahimong balaod miingon nga gawas nga dagko ang plaka, dagko sab pagkasuwat ug color-coded na ang mga numero.

Ang Land Transportation Office (LTO) maoy gitahasan pagpili hasta sa kolor nga ibutang sa matag rehiyon.

Ang tumong niini nga mas mapadali ang pag-ila kun kinsa ang tag-iya sa mga motor, ilabi na kun ang motor gigamit sa krimen.

Matud pa nga kun ang maong motorsiklo gamiton sa krimen (grave felony) ug nieskapo human nakabangga, kasohan ubos sa Revised Penal Code ang drayber, tag-iya sa motor, hasta ang pasahero niini.

Silot nga reclusion temporal (12  ngadto sa 20 ka tuig nga pagkapriso) hangtud  reclusion perpetua ( pagkapriso og 20 ka tuig ngadto sa 30 ka tuig).

Kun gamiton ang motor sa mas gaan-gaan nga krimen ang nakasala mapriso og unom ka buwan ngadto sa unom ka tuig (prision correctional) hangtud prision mayor pagkapriso og unom ka tuig ngadto sa 12 ka tuig.

Kun masakpang nagmaneho nga wala motuman sa gidak-on sa plaka, ang drayber mahimong prisuhon og unom ka buwan ngadto sa usa ka tuig o pamultahon og P50 mil apan di molapas og P100 mil o ang duha gyud ka silot, priso ug multa.

Maayo unta ang tumong sa maong balaod ilabi na nga daghan nang mga krimen nga binuhatan sa riding-in- tandem kansang mga motor lisod subayon.

Apan lisud tuohan nga pinaagi sa dagkong plaka makasulbad na kini dayon sa krimen o makapakgang og krimen kay ang mga kriminal nga riding-in-tandem dili man mogamit sa tinud-anay nga plaka sa ilang gamitong motor.