Niadtong nag-uwan og asin
Andam na ang mga ayroplano sa Philippine Air Force (PAF) sa Mactan-Benito Ebuen Air Base sa Lapu-Lapu City alang sa pagsuway sa paghimo og artipisyal nga uwan sa Bohol, Negros ug ubang bahin sa nasud nga naigo na sa El Nino.
Gamiton sa cloud seeding operation ang GAF N-22 “Nomad” twin-engine turbo-prop nga mga ayroplano nga nataoran sa niaging mga adlaw sa cloud-seeding equipment. Ang mga “Nomad” paluparon sa mga piloto sa 220th Airlift Wing samtang ang cloud seeding operations himuon sa mga sakop sa 900th Air Force Weather Group.
* * *
Matud sa retiradong direktor sa PAGASA Visayas nga si Oscar Tabada di haom sa cloud seeding ang Sugbo tungod sa kanipis sa isla ug sa ka-way dagko nga dams. Mas haom ang Bohol kay mas lapad, mas dagko ang dams ug mas andam ang kadagkoan sa Bohol sa pag-abaga sa dakong gasto.
Gibanabana sa PAF nga usa ka milyon ka pesos ang gasto sa pagpalupad og ayroplano alang sa cloud seeding. Mao ni ang nakaaghat sa National Irrigation Administration (NIA) sa pag-awhag nga himuon ang cloud seeding nga kataposang kapilian.
* * *
Niuyon si Tabada sa NIA. Bisan sa modernong mga teknolohiya, sama sa mga radar sa PAGASA nga makasukod sa gidak-on sa panganod ug gikusgon sa hangin nga labing haom sa pagpabuhagay og artipisyal nga uwan, di pa hingpit nga kasaligan ang cloud seeding.
Labing dakong babag nga nakit-an ni Tabada mao ang kakuwang sa mga panganod nga kabuboan og sinakong asin aron mahimong uwan. Kun makatsamba og panganod sa tin-aw nga kalangitan, nitataw si Tabada nga way garantiya nga ang gidaghanon sa uwan makabawi sa dakong gasto.
* * *
Nahinumdom si Tabada sa eksperimento nga cloud seeding nga ilang gihimo sa Cebu City niadtong 2017 nga nisangpot og daklit nga uwan nga wa kabawi sa P1.5 milyones nga gasto. Giangkon hinuon niya nga mas sayon nang cloud seeding karon.
Niadtong wa pay radar ang PAGASA, pasakyon sila sa PAF aron lang pagpangita og panganod. May mga higayon sab nga nabuboan og asin ang nipis nga panganod. Nga nagkapuliki silang Tabada og panubag sa tawag sa mga molupyo nga nangutana nganong giuwan og asin ang ilang kabalayan.
- Latest
