Hustisya ni Christine Lee Silawan

Dili matukib nga kasubo ang gibati sa mga tawo ilabi na gyud sa mga ginikanan niining 16 anyos nga si Christine Lee Silawan sa iyang gidangatan kinsa walay kukalooy nga gipatay sa mga kriminal nga dili hitupngan ang katampalasan.

Posibleng gilugos ang dalagita kay wala namay sapot ang iyang ubos nga bahin sa lawas ug ang makapakitbi sa atay ang pag laplap sa iyang nawong nga gipakisama sa usa ka baboy.

Tawo pa ba kaha ang naghimo sa naasoy’ng binuhatan nga bisan gamay nga kalooy wala naman lang gyud? usa ka batan-ong babaye nga walay ikasarang ang kusog sa pagpakigbatok sa mga tawong modagmal kaniya.

Murag gihilap akong galamhan sa kalooy dihang una nakong nakita ang hulagway sa social media ang nahitabo nga daw dili katuohan nga dunay tawong makahimo sa paglaplap sa nawong sa usa ka batan-ong babaye.

Si Christine Lee usa ka buotan nga bata, gani timailhan niini ang iyang pag-alagad sa Ginoo pinaagi sa iyang pagserbisyo sa simbahan sa Barangay Pajac, Dakbayan sa Lapu-Lapu.

Sa wala pa siya mabiktima sa krimen, kataposan niyang gihimo ang pag-serve sa simbahan busa walay magdahum nga mabiktima siya sa linoog nga krimen.

Matud pa sa iyang higala nga sakristan nga igo lang niyang gibiyaan kadyot si Cristine apan pagbalik niya wala naman, nagpasabot ba nga dunay midagit kaniya?

Niadtong niaging mga semana naukay ang Lapu-Lapu dihang dunay batang babaye ang mitaho nga hapit kuno siya makidnap, apan gipakawalay bili kini sa mga otoridad.

Apan hilabihan man ka lisang ang gibati niadtong batang babaye tungod sa iyang kasinatian. Posible kaha nga ang pakyas nga pag kidnap sa bata ug ang nahitabo sa 16 anyos adunay kalambigitan?

Seguro remote ang posibilidad apan angayan nga tan-awon sa mga otoridad ang anggulo kay delikado kaayo simbako mahitabo na usab sa umaabot nga mga adlaw kun dili madakpan ang mga kriminal.

Kini pangagpas lang tungod kay dako nga posibilidad nga gidagit si Christine kun basehan ang giingon sa iyang higala nga kadyot ra niyang gibiyaan kay mangihi lang.

Posibleng sa laing dapit gipatay ang dalagita ug gilabay lang sa bakantihan sa Mahayahay Bankal kay bisan og luag ang wanang sa dapit posibleng adunay laing mga tawo nga anaa didto nga makadungog unta sa syagit sa biktima.

Manghinaut kita nga mahatagan ug hustisya si Christine Lee Silawan nga nabiktima sa krimen nga natunong pa gyud niining buwan sa kababayen-an.