Drugas, walay paghubas

Walay puas ang nga drug operation ang gipahigayon sa mga otoridad nga misangpot sa pagkasakmit sa mga shipment sa shabu.

Gani ning bag-o lang nakompiskar sa kapolisan ang 28 ka kilos nga shabu nga gihulagway nilang kinadak-an nga supply sa drugas nga nasakmit sa Sugbo nga nagkantidad og dol-an sa 200 milyones pesos.

Unang nasakmit ang 18 kilos nga illegal druga gikan sa position ni Elymar Ancajas nga nagpuyo sa baranggay Inayawan dakbayan sa Sugbo. Samtang laing 10 kilos nga shabu ang nasakmit atol sa follow up operation didto sa lungsod sa Consolacion gikan sa position ni Jocelyn Encila. Nadakpan ang babaye lakip na ang iyang mga ginikanan kinsa gipangbalhog na sa bilangoan.  Gawas sa illegal nga drugas gikompiskar usab sa mga otoridad ang daghan nga mga alahas ug mga sakyanan gikan sa pinuy-anan ni Jocelyn Encila.

Kini tungod kay kadudahan asa gikan ang maong mga kabtangan, giunsa kini pag angkon sanglit wala man maestablisar unsay panginabuhi sa dinakpan.

Ang inahan niini mamaligyaay og halo-halo samtang ang amahan mamaligya og uling, dili man kuno sa pagmata sa iyang panginabuhi apan kun mao lang kini ang saligan dili sila makaangkon og ingon ka daghan nga mga kabtangan.

Gani ang balay niini anaa man sa high end subdivision nga centralized- aircondition ug naa pay mga cctv cameras.

Sa kasayoran sa kapolisan kining si Jocelyn uyab ni Rustico Ygot nga nabilanggo sa National Bilibid Pententiary gumikan sa illegal drugs.

Ang Ygot drugs group mao kuno ang naglihok sa Sugbo og mga kasikbit nga dapit, bisan toa sa prisohan si Rustico nakahimo pa gihapon pag supervise sa ilang illegal drug trading.

Gani ubos sa imbestigasyon si Ygot sa NBI tungod kay nakagamit kini og cellphone bisan naa kini sa prisohan nga naka video call pa.

Sukad milingkod sa pwesto si Presidente Duterte walay pagluag ang kampanya batok sa illegal drugs gani daghan na kaayo ang nangamatay nga mga nalambigit sa drugas.

Apan nagpadayon man gihapon problema, nangawagtang kadtong uban nga mga nabantog kaniadto apan naa na say mga nipuli kanila sa maong tinonto.

Aduna pa kahay kataposan ang problema sa illegal nga drugas? hangtod kanus-a man mapuhag ang mga anaa sa likod sa pagkuyanap niini? In fairness sa mga otoridad galihok man sila nga misangpot sa pagkasakmit sa dinagko nga bulto o supply sa illegal drugs.

Dili man sad tingali palpak ang ilang intelligence network kay ang ilang mga malamposon nga operasyon pulos intelligence driven man.

Sa kadagko sa shipment sa shabu daghan na kaayong mga bata o bisan mga dagko ang maguba ang kaugmanon.

Sa umaabot eleksyon magbaha kuno ang drugas, ang mga durugista mohimo niini aron isuporta sa mga kandidato nga ilang paluyohan sa tinguha nga maoy manalipod sa ilang mga interest kun mabutang na kini sa pwesto. Kun ang mga otoridad lang atong saligan sa tanan, ambot lang duna bay kasulbaran apan kun seryoso kitang katawhan nga moabag pagsulbad basin ang adunay mahitabong paghubas sa tinubdan sa problema sa drugas.