Cebu City Medical Center building dalion paghuman

Gipaspasan gyud karon ang pagtrabaho sa mga interior designs sa bag-ong gitukod nga Cebu City Medical Center (CCMC) building aron nga mahuman kini pagdali og magamit na sa mga lumolupyo sa siyudad.

Si Konsehal Mary Ann delos Santos maoy nangunay gyud sa pagsuperbisar sa nagpadayong construction kay siya man ang deputy mayor for health and hospital matters ug maoy gisaligan ni Mayor Tomas Osmeña niining maong proyekto.

Gitug-anan ko ni Delos Santos nga gusto na gyud unta nila ni Mayor Osmeña nga kabuksan kini kaniadto pa ganing Disyembre, apan unsaon nga nalangan man ang contractor sa ilang mga gimbuhaton, mao nga mora’g gipamulta man gani tingali

Nahunong man gud ang pagtukod niining maong building kay diha nga mibanos na si Osmeña sa pagka mayor, ug bag-o na usab ang Building Official sa dakbayan, nasuta nga gitukod ang CCMC building bisan og walay construction permit.

Ang City Planning and Development Office wala mohatag og clearance kay sayop ang pagtukod. Ang haligi sa hospital building, anaa ra gyud kilid sa Panganiban Street nga unta ang balaod naglatid man og setback nga pipila ka metros gikan sa karsada.

Mao nga gipangitaan og sulbad, apan dako na kaayo ang gasto kun gub-on na usab ang mga haligi nga natukod na. Kadto maoy nakapalangan sa pagtukod sa CCMC building.

* * *

Ang mga senior citizens dinhi sa Dakbayan sa Sugbo hatagan na usab og cash assistance sa ikatulong semana niining bulana.

Matud ni Lea  Japson nga paningkamotan nila nga madala pa sa Marso 16, apan kun dili gyud, adto na sa ikatulong semana.

Si Konsehal Jun Gabuya nga maoy chairman sa Committee on Social Services sa City Council, mipasabot nga medyo malangay ang paghikay sa payroll kay ang hataganan nga seniors niabot na og 75,028.

Kaniadtong 2016, niabot man lang og 67,300 ang mga senior citizens nga gihatagan.

Si Konsehal Gabuya ug Japson nagtinabangay aron maapil ang uban nga dugay na nga nagpaabot.

Mosamot pa gyud ni kadaghan unya kay gisugyot ni Konsehal Gabuya nga kadtong mga seniors nga narehistro ug nakabotar sa 2013 elections, apilon na sa paghatag og cash assistance.

Ang gisugyot nga ordinansa ni Konsehal Gabuya gitun-an na sa Committee on Laws.