Puasa

Ang pagpuasa dili lang usa ka balansayon nga dunay dakong kalambigitan sa pisikal nga kaayohan. Gani irekomendar kini aron sa ingon ma detoxify ang lawas gikan sa bisan unsang toxin nga magdala og kadaut nato.

Usa pud kini ka balansayon nga mohimong mo detoxify pud sa atong kalag.

 Sa Balaang Kasulatan labina gyud sa Karaang Panahon ang pagpuasa nagpasabot og paghinulsol sa sala nga nahimo.

Gani sa kapanahon ni Jonas sa dihang iyang gisangyaw ang nagsingabot nga kalaglagan sa Ninibe ang mga taga Ninibe ang naminaw niini ug ang hari mismo nisugo nga kinahanglang magpuasa ang mga tawo ingon man ang mga hayop.

Tungod niini nausab ang hukom sa Dios. Imbes silotan iya silang gipasaylo.

Si Haring David kay nakasab-an ni Propeta Matan gumikan sa iyang pagpangita og paagi aron mamatay si Urias bana ni Batseba ang nagpuasa sa pamasin nga dili mamatay ang ilang anak ni Batseba.

Sa bag-ong Tugon ang atong Ginoo nagpuasa sulod sa kap-atan ka mga adlaw aron sa ingon mamahimo siyang andam sa iyang umaabot nga misyon o tahas.

Mao nga ning panahon sa kwarisma kun makahimo lang kita angayan lamang, nga kita magpuasa labina kun duna kitay pangayoon nga mahinungdanon kaayo gikan sa Ginoo.

Hinuon, matag puasa dunay social dimension. Nagpasabot kini nga diha sa pagpuasa kita dili mokaon kay ang gahin alang nato ato mang gitabang sa mas nagkinahanglan pa kay kanato.

Ang pagtago sa pagkaon sa atong ref dili puasa kondili tinihik.

Sa laing bahin ang pagpuasa dili lang mahitungod sa paglikay sa pagkaon.

Ang pagpuasa nagpasabot usab og pagpitol sa atong galamhan gikan sa bisan unsang makapalayo kanato gikan sa Dios.

Nagpuasa ta ug diha sa maong balansayon atong himoong haw-ang atong kaugalingon aron makasulod ang Ginoo ug molihok ang grasya ngari nato tungod kay atong giangkon nga diha lamang sa mapaubsanong pagdumili sa kaugalingon ang Dios mosulod sa atong kinabuhi.