Nganong naiwit ang Camotes
Human sa unom ka tuig nga kalangay, kasugdan na pagtukod karong tuiga ang kabalayan sa mga biktima sa bagyong Yolanda sa upat ka lungsod sa isla sa Camotes. Sa mga dapit sa amihanang Sugbo nga nagusbat ni Yolanda, naiwit ang Camotes kay wa pay General Management Plan (GMP) nga motugot sa pagtitulo sa relocation sites.
Maong wa pay natukod nga bisan usa sa 3,153 ka pinuy-anan sa mga biktima sa Camotes. Maayo na lang nga nag-apura ang National Housing Authority (NHA) kay gitagalan ni Presidente Rodrigo Duterte hangtod sa kataposan ning tuiga.
* * *
Inay magpaabot sa GMP nga wa pa matiwas sa Department of Environment and Natural Resources (DENR), nisugot ang NHA nga matukod na ang kabalayan tungod sa pagdeklarar sa DENR nga gawas sa danger zones ang relocation sites.
Apan way kontraktor sa NHA nga nisukol tungod sa kalayo ug kadako sa gasto sa paghakot sa construction materials sa Camotes.
Maong gipasa sa NHA ang tahas sa pagpangita og lokal nga mga kontraktor nga moapil sa subasta sa mga proyekto ngadto sa local government units (LGUs) sa Camotes.
* * *
Si Mayor Erwin Yu sa Tudela nitug-an sa Arangkada sa DYAB Abante Pa, Bisaya! nga samtang gihangop nilang pagsugod na sa kabalayan duna sab silay mga panagana:
• Di silang kapalihok sa bids and awards committee (BAC) nga maoy mopahigayon og subasta kon way garantiya sa NHA nga mabayran ang modaog nga mga kontraktor; ug
• Tingali’g maabtan sa election ban dungan sa pagsugod sa campaign period sa lokal nga piniliay karong Marso 29.
* * *
May maayong balita alang ni Yu ug ubang lokal nga mga opisyal sa Camotes si Engineer Constancio Antiniero, tagduma sa NHA sa Sugbo:
Andam nang pundo nga i-download ngadto sa LGUs ug giaprobahan sa ulohang buhatan ang pag-usbaw sa presyo sa matag housing unit gikan sa P290,000 ngadto sa P471,000. Apan ang di maayong balita mao nga maibanan ang gidaghanon sa housing units nga matukod.
Sa ato pa, mahimong di na matuman ang gipasalig sa NHA nga pagtukod sa 1,960 ka kabalayan sa San Francisco, 275 ka kabalayan sa Poro, 258 ka kabalayan sa Tudela ug 660 ka kabalayan sa Pilar.
* * *
- Latest
