Ang kalendaryo sa Capitol

Ato ning hisgutan dinhi ning atong lindog karon, gumikan sa kalendaryo sa Capitol nga gihatag kanako ni Rene Alquizola, atong kauban kanhi sa Information complex sa gobiyerno,  didto siya sa dyMR- Radyo ng Bayan samtang diri kami sa regional office sa Department of Public Informatioon.

Mao nga hangtud karon nagpadayon ang among pagbinayloay sa mga kasayoran nga among mahagdaw, ug ni Leo Lastimosa pa, “kasayoran nga among makuykoyan.” Ug ang mga kaugmaran sa Capitol maoy buot niyang ipaambit nganhi kanako ug nganha kaninyong nagsunod ning atong lindog.

Ug tuod man, ania ang kalamboan ug mga proyekto nga napatik sa 2019 nga calendaryo sa lalawigan sa Sugbo:

1)Upgrading of provincial hospitals. 2) Medical and dental missions. 3) Paglaum scholarship. 4) Halad alang  kang Lolo ug Lola. 5) Farm-to-market roads. 6) Provincial Women’s Commission livelihood programs. 7) New heavy equipment. 8) Serbisyo Caravan sa Kapitolyo. 9) Farmer-Scientists training program. 10) Patubig projects. 11) Kusina sa Kahimsog ug Pag-amoma. 12)  Local and overseas job fairs. 

Lagmit ang mga detalye niining maong mga proyekto atong mabasa sa mga tarpaulin o mga flyers nga ilang gihimo.

Pananglitan, unsa nga specific o matang sa upgrading ang ilang gihimo sa mga tambalanan sa lalawigan ug diin nga mga hospital; Pila nay naka-graduate sa scholarship program; Pila ka kilometro ang natukod nga farm-to-market roads, diin nga mga barangay, pila nay nagasto.

Unsa nga mga livelihood programs ang gipasiugdahan sa women’s commission; Unsa nga mga bag-ong heavy equipment . Hain man kini sila i-deploy karon; Unsa man ning serbisyo caravan, aduna bay naka-benefit niini; Unsa nga mga lungsod o barangay ang nakapahimulos karon sa patubig prject; Unsa man ning kusina sa kahimsog; ug pila nay na hired-on-spot niining ilang mga job fairs.

Matud ni Rene dili kay mao ra kini ang mga proyekto sa lalawigan. Gipahaum man lang gud kuno kini sa 12 ka bulan.

Hinuon sa akong pangagpas, tungod kay wa man kitay labut sa lalawigan, being a highly urbanized city, wa kinahanglana nga masayud kita sa mga kalamboan sa lalawigan. Ug lagmit ang ilang pagpakisayod ug pagsabwag sa kasayoran, atua nila i-concentrate sa kalungsoran.         

Ug hinaut nga sa ilang giingon nga kalamboan sa matag Sugbuanon, ilang gihatagan ang matag lungsuranon sa lalawigan sa hingpit nga kasayoran labut sa tanang kalamboan sa Capitol. Otherwise,  sayang ang tanan nilang mga paningkamot. Ang basihan ra ba unya inigbotar na sa mga Sugbuanon mao ang performance.