“Nindot nga pangampanya”

Nagsugod na ko pagsuroy sa pulongpulong sa mga kandidato sa lainlaing partido dinhi sa dakbayan.

Dunay uban nga kusog kaayo nga mosaway ug mohimohimo og mga pasangil sa ilang kaatbang. Para nako, dili gyud kini maayo kay imbes ganahan ang mga tawo mobotar niining mao nga mga kandidato, dili na lang gyud hinoon mobotar.

Gidayeg nako kay ang mga suod nakong higala, wala gyud mangatake sa ilang mga kaatbang aron nga sila makabentaha. Nindot ang gihimo nila ni Konsehal Mary Ann delos Santos, Dave Tumulak, Junjun Osmeña, Jerry Guardo ug Jun Gabuya kay wala gyud sila’y atake sa ilang mga diskurso.

Ang ubang kandidato wala pa nako madunggi kay ulhos-ulhos man gud sila nga modiskurso ug magbalhinbalhin man sab ko’g lugar nga adto ko maminaw.

Para nako, nindot ang gihimo ni Konsehal Delos Santos kay wala gyud niya daota ang iyang kaatbang bisan og pwede man unta niyang gamiton ang pagtumbok ni Presidente Duterte sa iyang kontra, apan mga plataporma ra gyud ang iyang gidiskutir.

Kagahapon, giingnan ko ni Konsehal Jun Gabuya nga ang iyang mga dumadapig mitaho nga ilang nadunggan ang usa ka kandidato nga maoy adik sa drugas.

Pero, maayo unta og dili lang mobawos ang higala nako nga konsehal kay samok na kaayo. Ang katawhan nasayod na man kon kinsa ang angay nilang botaran.

Hinuon, wa may kaso kon mangatake sa kaatbang nga kandidato, basta tinuod lang ug dili kay gituyo ra gyud ang paghimohimo aron pagdaot sa hingtungdan.

* * *

Husto si Konsehal Dave Tumulak nga angay’ng magsultihanay sila si Brigadier General Debold Sinas ug si Inayawan Barangay Captain Kirk Bryan Repollo.

Nagkaestrukis sila si Sinas ug Repollo tungod sa pagsupak sa kapitan nga matukod ang police station building diha sa dapit nga gidonar sa kanhi opisyal sa barangay, apan dili ipadayon ni Kapitan Repollo kay ang maong luna maigo man sa road widening project.

Dili man tingali angay’ng ikasuko ni Sinas ang pagsupak ni Kapitan Repollo kay ilisan man sila og luna nga adto pwedeng magtukod og police station building.  Pag-estorya ra mo uy, dili maayong padak-on kining mao nga panagsungi ninyo kay sigurado nga apektado ang publiko.

* * *

Nindot kaayo ang proyekto ni Konsehal Jun Gabuya nga gusto niyang ipaapil nga pahatagan og cash assistance ang mga senior citizens nga narehistro ug nakabotar kaniadtong 2013.

Kining maong gisugyot nga ordinansa ni Gabuya gipatun-an na sa Committee on Laws sa Cebu City Council aron sutaon kon tukma ba kini nga ipatuman.

Para nako angay man gani nga apilon na kadtong mga narehistro ug nakabotar sa eleksiyon sa miaging 2016 kay gisaad baya kini ni Mayor Tomas Osmeña human siya makadaog sa 2016 elections. Mabuhay ka konsehal Jun Gabuya!