Empowered Women sa PRO-7

Kaniadto halos tanang top posisyon sa mga ahensya sa kagamhanan gidominahan sa kalalakin-an lakip na sa Nasudnong Kapolisan apan dinhi sa Police Regional Office 7 dili lang usa kon dili pito ka mga babaye ang naghupot sa labing taas nga pwesto sa ilang mga area of responsibility, Sila ang “The Seven Empowered Women” sa PRO-7.

Sa Dakbayan sa Sugbo, sa unang higayon nabutang sa pwesto ang babayeng director sa Cebu City Police Office nga mao si Police Col. Royina Garma kinsa gihulagway nga usa ka isog, ug lig-on nga lider sa kapolisan sa dabakayan.

Dili kuno sayon ang giagian sa opisyal ayha niya naabot ang naasoy’ng posisyon sanglit adunay mga tawo nga mipakagamay sa iyang katakos sanglit usa man siya ka babaye. Gani dunay higayon nga gikwestyon sa usa ka personalidad ang iyang pagka pangulo sa kapolisan kun makahimo ba siya sa responsibilidad nga dugay nang gihuptan sa usa ka lalaki.

Gikinahanglan pa nga modiga pa siya sa iyang mga credentials ug uban pang mga supporting documents nga dili gyud unta angayan niyang ipakita tungod kay nasayod man siya sa iyang katakos hinungdan nga naabot niya ang iyang nahuptan karon. Dili kuno malikayan nga adunay diskriminasyon sa kababayen-an hangtod karon apan wala kini makapatarog sa paghimo ni Col.Garma sa iyang trabaho tungod kay dili masukod sa gender sa usa ka tawo ang serbisyo.

Niining bag-o lang 18 ka kilong shabu ang nasakmit sa kapolisan sa dakbayan sa Sugbo gikan sa usa ka sakop sa sindikato sa illegal nga drugas nga misangpot usab sa pagkasikop sa laing personalidad didto sa lungsod sa Consolacion. Kini ang kinadak-ang drug supply nga nasakmit sa kapolisan dinhi sa dakbayan sa Sugbo, ubos kini sa babaye nga namunoan sa CCPO walay lain kon dili si Col. Garma.

Pipila lang kini sa iyang kalamposan diin usa sa iyang programa ang “Itug-an ni CD” nga mao ang pagpakigsandurot sa katawhan, tumong niini nga adunay access ang komunidad ngadto sa kapolisan sa mga panghitabo sa ilang dapit lakip na ang mga kriminalidad.

Samtang sa Siquijor, sa unang higayon adunay babaye nga nahimong provincial director sa kapolisan nga mao si Police Col. Angela Rejano kinsa classmate ni Garma.

Ang pagkababaye kuno dili babag sa paghimo sa tahas nga gisangon sa mga opisyal sa bisan unsa nga grupo basta ang mahinungdanon ang kasing kasing ug sinseridad sa serbisyo.

Usa ka inahan ug asawa si Rejano nga alang kaniya usa ka hiyas ug bentaha sa pagdumala sa usa ka organisasyon kay mas nakasabot man sila sa gikinahanglan sama sa usa ka pamilya.

Ang pagkab-ot sa labing taas nga position ang target ni Col. Rejano nga nahatagan ug katumanan sa paglingkod niya isip PD sa SPPO ug ang posibilidad nga sa umaabot nga adlaw maabot niya ang kinatas-ang pwesto sa Philippine National Police.

Ang pagbutang sa mga babaye sa mga top position sa PRO-7 brainchild ni Police BGen. Dibold Sinas tungod kay misalig siya sa katakos sa kababayen-an nga makahimo o mas malabwan pa gani kun unsay mahimo sa mga lalaki.

Gawas nilang Garma ug Rejano, gibutang usab ang laing lima ka mga babayeng police officials sa mga component cities sa rehiyon nga naglakip nilang PLTC. Maribel Gitigan sa Danao Police, PLTC Emelie Santos sa Bogo PNP, PLTC Janette Rafter sa Toledo, PLTC Clarissa Gabutan sa Carcar ug PLTC Catherine Ramos sa Tanjay.

Wala sa babae o lalaki ang sukdanan sa serbisyo kondili ang kakugi ug paningkamot nga makab-ot ang kalamposan sa mga programa nga ipatuman sa katilingban.

Mabuhi ang kababayen-an!