Salamat Mayor Tomas Osmeña

Makapahibulong gyud kaayo kun nganong nagkadaghan na man hinoon ang mga shabu nga masakmit sa kapolisan ug ingon sa wala mahadlok ang mga pushers bisan sa sagunson nga pagpamatay sa mga nalambigit niini?

Sayonan ka nga 18 kilos nga shabu ang nasakmit didto sa Barangay Inayawan, Dakbayan sa Sugbo ug laing 10 ka kilo didto sa Consolacion? Dayegon nato ang kapolisan sa ilang kalampusan.

* * *

Nalipay kaayo ko kay paspas gyud kaayo ang kagamhanan sa Dakbayan sa Sugbo sa pagsemento sa mga gubaong karsada.

Matud ni Mayor Tomas Osmeña nga sagad semento na gyud ang ilang gamiton aron nga dugay’ng maguba ang karsada, itandi sa aspalto.

Angay’ng pasalamatan sa mga lumolupyo sa south district si Konsehal Jun Gabuya kay siya maoy naninguha aron nga masemento ang main road sa Saint Jude Acres.

* * *

Dili pa gyud diay daghan ang nasayod nga may opisina na ang LTO diha sa Robinsons Fuente nga dali ra kaayong makaisyu og driver’s license sa mga molukat og lisensya.

Ang akong silingan, magpatabang unta nako sa pag-renew sa iyang lisensya aron kuno dili siya madugay. Nasayod man gud siya nga may mga amigo ko sa LTO.

Akong giingnan nga adto sa LTO diha sa Robinsons. Tuod, paglabay sa kapin sa oras, mibalik siya sa akong balay.

Masuko na unta ko kay giayo man nako sa paghatag og instruction kun asa siya magpa-renew nga dali ra.

Nagngisi ang akong silingan nga mipahibalo nga napabag-o na niya ang iyang lisensya.

Abi ninyo og nganong paspas kaayo ang paglukat og lisensya diha sa Robinsons? Dili kaayo daghan ang moanha.

Ang rason diay kay menos pa ang nahibawo nga adunay opisina ang LTO diha sa Robinsons Fuente. Tabang nako ni kaninyo aron dili kaayo kamo mahasol.

* * *

Pahimuslan nako ang pagpasalamat ni Mayor Tomas Osmeña nga nagpasiugda siya og libre nga Japanese Language Course diha sa Cebu City Library.

Wala ni bayad kay ang mga maestra ug maestro nga motudlo og pinulongang Hinapon, wala magpabayad. Pasalamatan gyud nako si Jazzy Yamada Sensei, ang akong maestra, sa iyang libreng serbisyo.

Ang nakanindot ni Jazzy Sensei kay makamao siya nga mosulti og Binisaya. Pero wala siya makapugong sa pagpahiyom diha nga akong giingnan nga Watashi No Sensei wa Utsukushi Desu.

Bahala na mo nga mangita’g hubad kun unsa na. Hahaha.