Mga Parojinog sa Sugbo
Nahibaw-an ni Police Major Jovie Espenido, ang kontrobersiyal nga hepe sa kapolisan sa Ozamiz City, ang gikaintapan nga teritoryo sa Pamilyang Parojinog, nga ang mga tipaka sa Parojinog Drug Group naglihok na karon sa Sugbo ug ubang bahin sa Kabisay-an human nagkatibuwaag ang ilang puwersa sa Mindanao.
Lain niyang kasayuran: Nagsugod ang mga Parojinog pagpanag-iya og apartments ug condominium units sa Sugbo kay gawasnon silang nakasud-gawas atol sa pamunoan ni Heneral Marcelo Garbo sa Police Regional Office sa Central Visayas nga gilambigit ni Presidente Rodrigo Duterte sa ilegal nga drugas.
* * *
Nitug-an si Espenido sa Arangkada sa DYAB Abante Pa, Bisaya nga sa nangaging katuigan gihimo sa mga Parojinog ang Sugbo nga pahuwayanan sa di pa ug human sa dagko nilang tulis sa Metro Manila ug ubang bahin sa nasud.
Apan human sa pagronda nilang Espenido ug kaubanan sa mga Parojinog nga nisangpot sa kamatayon ni Mayor Reynaldo “Aldong” Parojinog ug laing 14 niadtong Hunyo sa niaging tuig, gibalhin ang base sa ilang operasyon dinhi sa Sugbo, labi na sa Mandaue City sa amihanan ug sa Talisay City sa habagatan.
* * *
Gipasidan-an ni Espenido silang Heneral Debold Sinas sa PRO 7, Police Colonel Royina Garma sa Cebu City Police Office ug Police Colonel Julian Entoma sa Mandaue City Police Office nga di kakumpiyansahan ang mga gaway sa mga Parojinog bisan sa pagkamatay ug pagkabilanggo sa ilang mga pangu.
Gibutyag ni Espenido nga nag-ipon na karon ang nahibiling mga sakop sa mga Parojinog ug ang kanhi karibal nilang pundok nga gipangulohan ni Jeden Duhaylungsod.
* * *
Kumbinsido si Espenido nga bisan sa pagkabilanggo ni kanhi Ozamiz City Vice Mayor Nova Princess Parojinog, ang giilang harang gangis katimbang sa iyang amahan, ug sa pag-freeze sa ilang katigayonan ug mga deposito sa bangko, daghang natago nga kuwarta ug mao gihapoy nagpalihok sa sindikato.
Iyang gibasehan ang kadaghan sa mga abogado ni Parojinog nga nitambong sa matag husay sa mga kasong gipasaka sa kapolisan ug ang pag-insistir sa prosecutors nga si Espenido gyud ang mobantay ug mokuyog sa mga testigo sa mga husay sa kaulohan sa kabalaka nga molikoy ang ilang mga testimoniya atubangan sa nagbuntaog nga mga panghaylo ug panghudlat.
* * *
- Latest
