Buntagong empleyado gusto marathon wad-on
Sa miaging alas 5:20 sa kaadlawon, Pebrero 17, Domingo, mituyo ko’g agi sa Osmeña Boulevard (kanhi Jones Avenue) aron pag-abot sa eskina P. del Rosario mopalit ko’g The Freeman/ Banat News.
Apan nakurat ko, sanglit diha pa lang gani ko nagsubay sa may Department of Health tungod, daghan na mang sakyanan ang misugat sa akong giagian?
Diay, ang pikas dalan nga gibulag sa center island, gisirad-an kay giandam para lamang sa marathon activities. Ug ang karsadang akong gisubay gihimong two lanes.
Mao nga usahay makapanghupaw-sukna ko sa kaugalingon: “Para kang kinsa ba diay kining mga dalana panahon sa kaadlawon o buntag sa adlaw’ng Domingo? Alang lamang sa nag-marathon, kinsa mihimo sa maong matang sa ehersisyo nga kalingawan samtang ang mga sakyanan nga paingon sa ospital, call centers, hotels, casinos ug uban pang estbalisamento nga gialagaran, napurihisyo?”
Matag tuig, nagbayad og rehistro ang tag-iya sa mga sakyanan. Linibo ang magasto. Kini walay labot sa driver’s license nga lukaton ug bag-ohon. Nagpasabot ba kini nga mas dako ang nabayran sa mga nag-marathon, hinungdan nga gihatagan sila’g special treatment?
Tiaw bay, bisag “Go” signal na, panahon na sa drayber nga mo-left turn sa nagkurus nga karsada, sinyasan sa CITOM nga pahunongon kay paunahon gyog palabang ang marathoners?
Mao ni ang giangalan sa higala kong enhinyero, kinsa misumbong nako, nga bisag iyaha nang turno sa paglarga, gipugngan lang kuno gihapon siya sa CITOM kay gustong tagaag prayoridad pirme sa pagtabok ang mga nag-marathon.
Matud niya, taudtaod na siyang nalangay ug dili siya gustong ma-late sa ilang trabahoan kay may no late, no absent cash incentive siyang giapas. Mao kadto, nga mipadagan gyud siya sa iyang sakyanan bahala nag dakpon siya sa CITOM. Wa man sab hinuon siya dakpa.
Kay kon gidakop pa siya, kuwentahan gyod kuno unta niya ang CITOM unsa kadako sa benefits ug salapi ang mawala niya sa higayon nga ma-late siyag report sa ilang opisina.
Hinungdan, nga nagpatabang siya pinaagi ning atong lindog, nga ipakuhit-hangyo ang mga magbabalaod nga tig-approve ning mga marathon activities sa karsada nga unta, wad-on na!
Sa mga approving authorities diha sa City Hall, posible bang matuman iyang giyangongo?
- Latest