EDITORYAL - Nagpakauwaw sa Sugbo

Dako kaayong kauwawan sa Sugbu ang nahitabong paglugos sa usa ka langyaw nga turista diha sa Lungsod sa Barili sa usa ka drayber sa traysikol niadtong nakalabay nga semana.

Ang maong drayber nadakpan sa kapolisan human ang 31 anyos nga Colombiana nisumbong sa mga otoridad sa gibuhat kaniya sa 41 anyos nga suspek  nga giingong imbes mohatud kaniya sa resort diin siya magsaka sa pagbakasyon dinhi gidala hinuon kini sa hilit nga dapit ug didto giamong-amongan.

Samtang tuod nadakpan ang suspek, magbutang kini sa Sugbo ilabi na sa lungsod sa Moalboal sa kauwawan tungod kay ang balita dali rang mokatap ug sigurong mipahibalo na ang biktima sa pamilya niini ug mga kaila.

Ang maong lungsod ug uban pang kalungsoran daplin sa dagat dinhi sa Sugbo nabantog nga tourist destinations tungod sa mga maanindot nga mga beach resorts ug popular kaayo sa mga langyaw.

Ang presensya sa mga langyaw nakatabang sa paglambo sa ekonomiya sa maong mga lungsod ug nakapanindot sa dungog sa tibuok probinsya sa Sugbo.

Dili mahimong basulon ang mga turista kun magabhian sila og maayo sa ilang paglaag-laag samtang nagbakasyon dinhi tungod kay ang ilaha mang tuyo dinhi mao ang paglingaw sa ilang kaugalingon. Busa dako kaayo kining hagit sa kapolisan ang  pagsiguro sa ilang seguridad ug kaluwasan samtang naa sila dinhi.

Samtang tuod alisto ang mga polis sa pagbantay sa seguridad tungod sa hulga sa terorismo angay sab nilang panid-an ang mga lokal nga mga krimen ilabi na kadtong mobiktima sa mga langyaw.

Kadtong nadakpan nga suspek, angay gyud kini pasakaan og kaso. Maayo na lang nga may kaisog ang biktima pagsumbong sa gibuhat kaniya sa suspek tungod kay kun nagpakahilom kini posibleng mousab ang maong drayber pagbuhat sa ingon ngadto sa ubang mga turistang iyang makursunadahan.

Ang opisyales sa maong lungsod ug bisan ang mga ahensya sa gobiyerno ilabi na ang kapitolyo kinahanglang tabangan ang biktima nga makab-ot ang hustisya.