Hoarding sa illegal drugs

Dili lang diay sa bugas ug lana mahitabo ang hoarding apil pud diay sa illegal drugs, mao kini ang gituohan sa kapolisan nunot sa nagsingabot nga eleksyon.

Ang mga durugista ilabi na kadtong dako nga personalidad sa habagatang bahin sa Sugbo ang mipakusog sa ilang drug operation.

Hayan mopabaha sila sa drug money alang sa mga kandidato nga ilang gisuportahan.

Mao kini ang gihugtan sa pagbantay sa kapolisan dinhi sa rehiyon dili lang ang mga durugista kondili apil na sa mga kandidato nga posibleng beneficiary sa drug money.

Pastilan basta ra ba eleksyon,  pwera lang niadtong mga ligdong nga kandidato kun duna pa, himoon ra ba gyud ang tanan makadaug lang sa piniliay, manikas man gani aron seguradong makalingkod sa pwesto.

Kun dunay mga kontribusyon gikan sa mga benefactor dawaton ra ba gyud kay maayo nalang magamit sa kampanya.

Bisan asa gikan basta kwarta hala bira, ingon niini ang realidad sa uban modawat bisan asa nga tinubdan.

Aw makita ang katag kay duna na bay mga opisyal nga nasampolan kinsa nangahay-ad tungod sa kalambigitan sa illegal drugs.

Ambot kun mobati pa ba og kahadlok ang mga kandidato kay mahimong makalusot sila apan masayran ra man gihapon.

Kung ingon niini gihapon ang sistema sa politika nga magawngan sa mga durugista magpadayon gyud nga molipang ang drugas sa nasod.

Maayo nalang nga nakalingkod sa pwesto si Presidente Duterte kay napugngan ang paglambo sa illegal drugs apan naa gyud gihapoy nangita og lusot.

Ang mga durugista karon mangita gyud og gamay’ng bangag nga makalusot sila aron makapangita og mga politiko nga moproteher kanila.