Plunder: Mga alalay lang ang nananagot
MAY kapansin-pansin sa tatlong dating senador na kinasuhan ng plunder -- sina Bong Revilla, Juan Ponce Enrile, at Jinggoy Estrada. Nakakalaya silang tatlo -- at kumakandidato pa nga para makabalik sa Senado. Si Revilla ay pinawalang-sala ng Sandiganbayan nu’ng Disyembre, bagamat mabigat umano ang ebidensya ng sala. Sina Enrile at Estrada ay out-on-bail, maski walang piyansiya habang nililitis sa karumal-dumal na krimen. Nakalusot sila dahil sa mga kakaibang katuwiran ng mga mahistrado ng Sandigan at ng Korte Suprema.
Higit sa lahat, mga chiefs of staff nila ang nananagot sa sala.
Si Richard Cambe, 10-taon alalay ni Revilla, ang sinentensiyahan ng habambuhay na pagkakulong, kasama si pork barrel queen Janet Lim Napoles. Lumabas sa paglilitis na sa P517-milyong pork barrel na pinarte, 50% ang napunta kay Revilla, 5% o P26 milyon kay Cambe, at ang labi ay kina Napoles at mga kasapakat na foundations. Pinasosoli ng Sandigan ang P124 milyon na idineposito sa bank account ni Revilla, pero ayaw nito dahil inosente umano siya. Kamala-mala mo, si Cambe lang ang mag-aabono ng buong P124 milyon na idineposito niya.
Si Gigi Gonzales Reyes, alalay ni Enrile, ay nakapiit sa Camp Bagong Diwa, Taguig. Maganda at nasa 50 taon gulang lang, maari siyang makulong nang 40 taon dahil direktang nakipagtransaksiyon kay Napoles. Naka-bail si Enrile dahil kuno sa “humanitarian grounds”: 95-anyos na siya. Pero tumatakbo pa siya sa eleksyon.
Si Paulyn Labayen, mas bata kay Reyes na alalay ni Estrada, ay nagtatago. Kapag mahuli siya, tiyak na hindi siya makakapagpiyansa. Direkta rin siyang nakipagtransaksiyon para kay Estrada. Naka-bail si Estrada dahil umano’y hindi “main plunderer” sa palagay ng Sandigan. Sa katwiran ding ‘yon pinawalang-sala ng Korte Suprema sa plunder si ex-President Gloria Macapagal Arroyo.
Sa ganyang “hustisya”, tiyak na magpapatuloy ang pandarambong.
- Latest
