Universal health care

Pangandoy sa matag Pilipino ang makabaton og libre nga health insurance gikan sa gobyerno.

Sulod sa dugay’ng panahon naglaway ang mga Pilipino sa komprehensibo nga healthcare program sa ubang mga nasud sama sa Amerika.

Gani kini maoy usa sa mga hinungdan nganong daghan sa mga Pinoy ang nangandoy nga molangyaw sa maong nasud ug adto na manimuyo.

Apan niadtong miaging semana, daw sa nahatagan og katumanan ang dugay na nga pangandoy dihang gipirmahan ni Presidente Rodrigo Duterte ang Universal Health Care Act.

Ubos sa maong balaud sakop ang tanang Pilipino sa health insurance sa gobyerno.

Duha ka klase ang membership sa health insurance—ang mga empleyado nga nagbayad og premium sa PhilHealth ug ang mga way trabaho nga i-subsidize sa gobyerno gamit ang nakolektang buhis.

Sa laktud, bisan og wa kay trabaho duna kay insurance nga magamit sa panahon nga ikaw nagkinahanglan.

Wa pa ta masayod sa kumpleto nga mga detalye unsaon ni sa pagpatuman sanglit wa pay implementing rules and regulation ang balaud.

Apan basi sa iyang mga probiso, way lalis nga kini kapahimuslan sa tanang Pilipino kabus man o adunahan.

Apan sama sa ubang mga balaud nga maayo ang intensiyon, dia sa pagpatuman ang dakong suliran.

Pananglitan mag-unsa ang libre nga insurance kon way doktor ug nurses nga moatiman?

Unsaon nimo ang libre nga insurance kun sa mga pampublikong tambalanan lingiwlingiwan ug labaylabayan ka lang sa mga doktor ug nurses?

Unsaon nimo ang libre nga insurance kun sa mga pampublikong tambalanan ikaw balibaran tungod kay puno ug wa nay katre nga kahigdaan?

Ang akong punto mao nga angayang siguroon pud sa atong gobyerno ang kalidad sa serbisyo sa mga tambalanan sa gobyerno ug igo nga mga pasilidad aron magmalampuson ang pagpatuman sa bag-ong balaud.

Hinuon dili ta kapaabot nga mamahimong perpekto dayon ang pagpatuman sa balaud. Apan nindot ni nga sinugdanan alang sa mas malamboon nga programa sa maayong panglawas gikan sa atong gobyerno.

Ug mapasalamaton ang katawhang Pilipino sa administrasyon ni Presidente Duterte niini.