Ang mga abusado ra’y moreklamo

Nangahadlok ang mga PUJ drivers niining plano sa kagamhanan sa Dakbayan sa Sugbo, pinaagi sa CITOM, nga magbutang og mga CCTV camera sa kadalanan alang sa pagpatuman og “non-contact apprehension.”

Kadtong mga driver nga makita pinaagi sa camera nga milapas sa balaod sa tukma nga pagmaneho og sakyanan, pamultahon sa CITOM, ug kun dili mobayad, pasakaan og kaso.

Ambot, nganong mahadlok man gyud ang mga driver, apil na si Rudy Laconza?

Nagpasabot ba kini nga malapason gyud sa balaod ang mga PUJ driver mao nga mahadlok sila? Karon gud, kun walay makita nga traffic enforcer ang mga driver, aw pwerteng mopaugat.

Samtang magsingabot sa eskina ug gusto sila nga mohunong, labaw pa sa porlon ang kahinay sa pagpadagan aron nga maabtan sila sa stop signal.

Apan kun makita nila nga dunay daghang pasahero nga tua nagpaabot sa atbang nga karsada, bisan og “caution signal” na, hala, mopadayon gyud sa pagbulhot nga wala maghunahuna nga makamugna sila og disgrasya.

Ang tinuod, ang mga driver nga matinumanon sa mga lagda sa tukmang pagmaneho og sakyanan, dili gyud mahadlok kay nganong dakpon man sila kun way nahimong sayop?

Nindot kining gisugyot nga ordinansa ni Konsehal Jerry Guardo ug angay kining suportahan sa kadaghanan. Dili kita magpadala sa pagsupak sa mga driver nga ang gihunahuna mao ra ang ilang kaugalingong interes nga makapasakay og daghang pasahero, bisan og gisupak na nila ang mga balaod.

* * *

Dia pa kita karon sa entrada sa tuig, ug tingbayad karon og business taxes niadtong adunay mga negosyo. Kapin sa P1.2 Bilyones ang nakolekta nga business taxes sa Dakbayan sa Sugbo gikan sa Enero 4 ngadto sa Enero 28.

Apan daghan pa nga mga magpapatigayon nga wala pa makabayad og buhis, ilabi na kadtong mga gagmay ra og negosyo nga para lang abag sa kita sa pamilya, sama sa pag-operate og karenderiya ug gagmay’ng tindahan.

Nindot  ang gisugyot nga ordinansahon ni Konsehal Eugenio Gabuya Jr. nga dili na lang pabayron og buhis ang mga gagmay’ng magpapatigayon nga ang puhonan anaa lang sa mga P10,000 ug ang ilang kita sa tibuok tuig wala molapas sa P100,000.

Atong klaruhon, bisan og gamay pa nga tindahan, apan namaligya kini og mga sigarilyo ug ilimnong makahubog, dili kini apil sa hatagan og exemption. Sa ato pa, pabayron gyud sila og business tax. Gipasabot ni Gabuya nga tumong niya niining mao nga ordinansahon nga madasig ang katawhan, ilabi na ang mga ginang sa panimalay, nga manginabuhi pinaagi sa pagpaninda, inay nga magsige og laag ug mag-tsismis. Dili ba Konsehal Jungabs?