Peace covenant

Isip kabahin sa paningkamot sa kapolisan nga hapsay ug malinawon ang pagpahigayon sa eleksiyon dinhi sa Sugbo karong umaabot Mayo, gipasiugdahan sa Cebu Provincial Police Office ang covenant signing sa mga kandidato sa lalawigan sa Sugbo niadtong Martes didto sa simbahan sa dakbayan sa Naga.

Tumong sa maong kalihukan mao nga mopirma ang mga kandidato ug mosaad nga dili mogamit og pwersa ug ubang matang sa pagpanikas aron modaog sa eleksiyon.

Ang covenant signing gisaksihan sa mga opisyal sa kapolisan ug simbahan.

Samtang dili garantiya ang covenant aron masiguro nga hapsay ug malinawon ang piniliay, apan ang suporta sa mga kandidato labi pa gyud sa mga incumbent nga mga opisyal importante.

Dinhi makita unsa sila kamatinud-anon ug ka komitido nga mapatuman ang hapsay, malinawon ug limpiyo nga eleksiyon.

Apan subo nga huna-hunaon nga ang mga incumbent hinuon nga opisyal sa lalawigan wala mosanong sa pinirmahay. Sila si Gobernador Hilario Davide III ug Bise Gobernador  Agnes Magpale wala mohatag og importansiya sa maong kalihukan.

Ang record sa kapolisan nagpakita nga nadawat sa mga buhatan nilang Davide ug Magpale ang imbitasyon alang sa covenant signing.

Ambot unsay ilang rason sa kapakyas pagtambong, apan alang nako way mas importante pa sa maong kalihukan.

Ang labing dakong baligho sa maong hitabo mao nga si Davide maoy pangulo sa Regional Peace and Order Council (RPOC) dinhi sa Central Visayas. Labaw ni bisan kinsa siya unta maoy angayang nag-una sa pagpirma sa peace covenant.

Ug isip kasamtangang gobernador sa Sugbo usa sa iyang mga responsibilidad ang sigurohon nga malinawon ang probinsiya.

Nitambong hinuon ang ilang kontra nga sila si Third District Rep. Gwen Garcia kinsa kandidato pagka-gobernador ug ang runningmate niini nga si Daphne Salimbangon.

Didto sab sila si Kongresista Wilfredo Caminero sa Second District ug ang kaatbang niini nga si Dalaguete Mayor Ronald Allan Cesante.

Didto sab ang kandidato pagkakongresista sa Third District nga si Pablo John Garcia ug ang mga kandidato sa First District pinangulohan ni Kongresista Samsam Gullas ug sa iyang apohan nga si Talisay City Mayor Eduardo Gullas.