EDITORYAL - Cocaine na pud

Bilyones ka pesos nga kantidad sa shabu ang gikatahong nakalusot dinhi sa nasud sa nanglabay nga mga buwan. Ingon niini kadagko. Apan niining bag-o lang niadtong adlaw nga Biyernes P462 milyones na sab nga cocaine ang aksidenteng nadiskubrehan.

Ang maong mga cocaine nga gituohan gikan pa sa nasud sa Columbia nadiskubrehan sa mga mananagat nga naglutaw-lutaw sa kadagatan ug ilaha kining gidala ngadto sa mga otoridad diha sa Sitio Habongan sa Barangay Poblacion, Dinagat ug Barangay Pacifico sa Siargao.

Ang maong mga cocaine bricks gisulod og selyadong box nga may marking JRC 1to 38. Niadtong nakalabay sab nga adlaw nga Domingo, may mga cocaine bricks usab nga nadiskubrehan sa kadagatan sa isla sa Barangay Sula, Vinzons sa Camarines Norte.

Matud pang Philippine Drug Enforcement Agency (PDEA) Director General Aaron Aquino ikanapulo na kini nga mga nadiskubrehang cocaine sa kadagatan dinhi sa Pilipinas.

Kun buot tan-awon ang mapa, ang Camarines ug ang Siargao pulos tanan nag-atubang sa kadagatan sa Pasipiko. Nagpasabot kini nga ang maong kadagatan maoy gihimong drop-off points sa mga drug smugglers.

Kahinumdoman nga sa miaging semana gikombiktong mabilanggo sa tibuok kinabuhi kadtong mga sakop sa Sinaloa Drug Cartel nga nag-operate sa Central America ilabi na sa Mexico nadakpan niadtong tuig 2014 didto sa Taguig City.

Posibleng kining grupoha maoy nagdala niining cocaine dinhi ug gidudahan nga nagkumboya na sila sa mga Chinese drug syndicates nga hagbay rang nag-operate dinhi pinaagi sa ilang shabu.

Apan kay hagbay naman kadtong nadakpan nga pipila ka mga miyembro sa Sinaloa ug bag-ohay lang kining mga nadiskubrehang mga cocaine, nagpasabot lang nga nagpadayon ang mga nahibiling mga miyembro sa ilang operasyon dinhi sa Pilipinas.

Ang pagsulod sa cocaine dinhi indikasyon nga kinahanglang pangusgan pa ang pagbantay dili lang sa mala kondili hasta sa kadagatan sa Pilipinas.