EDITORYAL – Salawayon

Makapabalaka ang nag viral nga video footage sa social media niadtong usa ka lalaking samaron gidala diha sa Tuburan District Hospital kinsa bisan walay tingog makitang nagpakiluoy nga siya tabangan sa mga kawani sa tambalanan.

Samtang ang maong video makadisturbo gyud sa maayong panghunahuna sa tawong makakita, wala hinuon kini magpakita sa kinatibuk-an gyud nga footage kondili kadto rang mga gutlo nga diin nagpalayo ang mga hospital staff.

Si Gemle Casas, 23, napusilan sa mga polis atol sa buy-bust operation sa Lungsod sa Tuburan niadtong nakalabay nga Biyernes. Gidala siya sa maong tambalanan.

Matud pang Dr. Rene Catan ang pangulo sa Provincial Health Office giatiman dayon sa hospital staff ang maong pasyente. Gani daghan pa siya og gipangsulti nga gitaoran og mga ekipong makatabang sa pasyente aron kini maluwas.

Apan didto sa mubo kaayong video, wala magkatakdo ang gipanulti ni Catan. Tingali pagkahuman pa niadto nga hugna ayha pa natauran og oxygen ug dextrose si Casas.

Makita sa video nga gitan-aw ra sa mga hospital staff si Casas nga nagkadugo ug naglimbag-limbag ug naglisod sa pagginhawa.

Madungog usab sa maong video nga adunay tingog sa babayeng nag-ingon og ‘ayaw paglihoklihok’, ‘dili na ni kaabot’ ug nag-‘bleeding.’

Kun ang mga netizens nga nakakita sa maong video wala ganahi ug gisaway ang maong tambalanan unsa nalang kaha ang gibati sa mga tagtungod kun sila sab makakita niini?

Ang eksplinasyon ni Catan sa mga tigbalita nga maong mipalayo ang mga staff tungod kay nagsige kini og pangluwa.

Aduna nay gihimong imbestigasyon bahin sa pag-post sa social media sa maong video nga giingong gikuha sa usa sab sa mga nurses. Ang Commission on Human Rights -7 mohimo sab og ilang imbestigasyon.

Ang gidangatan ni Casas nga gibandilyo sa social media ang mga kataposang gutlo sa iyang kinabuhi dili makatarunganon ug kinahanglang may manubag niini kay salawayon kadto nga buhat.