Kubalan nga politicians

Importante ang kasingkasing sa usa ka tawo. Kay kun ang tawo walay kasingkasing, ang iyang lawas ug kalag mamatay.

Dinhi sa Pilipinas, daghan kaayong molansar pagka Senador, Kongresista ug uban pang taas nga puwesto sa gobiyerno. Ang pangutana: Aduna ba silay kasingkasing nga nagsubay ang matag pinitik, sa espirituhanong kabubut-on sa Ginoo? Diha lang sa Senado ug Kongreso, pipila ba kanila ang nahiapil sa listahan sa higanteng negosyanteng Janet Lim-Napoles nga gibahinan-nakadawat  og minilyon ka pesos sa Priority Development Assistance Fund (PDAF)’s scam nga  gipanginahanan niya sa pagpaniobra?

Hurothurot sa mga Senador ug ubay-ubay nga Kongresista ang nahilambigit ning makauuaw’ng kaso, diin ang minilyong budget nga alang unta sa kaayohan sa katawhan, sagad nahipunta sa mga ghost projects ug personal nilang mga bulsa. Apan, may honest bang political servants ang miangkon? Silang tanan nanglihay sa makuyawng sudya sa kamatuoran.

Hinuon, pipila kanila ang nangapriso. Nga sa ato pa, may gibasehang lig-ong ebidensya nga sila nakabuhat og salaod. Ang nakaparat, kay halos tanan na-involved man sa maong binuang. Unya, nganong pipila ra man ang gisilotan?

Makapahibulong pa gyud. Kay ang mga nabilanggo, nakapiyansa ug may nakagawas sa prisohan nga namatud-an kunong walay sala. Hala, no?

Mao nga usahay makapangutana ko: Unsa man ning atong balaod sa Pilipinas, uy? Weather-weather lang? Paita, sa?

Di ba, one and same books ra man ang balaod sa atong nasod nga gisunod sa atong mga maghuhukom? Unya, nganong dili man managsama ilang desisyon? Nganong ang nadesisyonan na sa usa, usbon man sa lain? Patas pa kaha ang atong timbangan?

Ang dili pa gyud nako masabtan mao: Nga bisan ang usa ka politiko napriso na, nakasohan na, or may pending pang kaso, kini molansar lang gihapon. Ug, ambot, uy, nganong tugtan man gihapon sa COMELEC?

Modaog ra ba! Resulta? Aw, magpabiling mag-ilaid sa kalisod ang atong nasod. Ug mahimo kining forever, kon kitang katawhan dili magmaigmaton sa pagpanghashas kinsay angay natong pilion ning umaabot Mayo 13 mid-term election.

Nasayod na man ta kinsa kining mga kubalan nga politicians ang magpakalimpyo gyud bisag nagkahugaw na. Ato ni silang likayan ug atong sulayan kining mga bag-o nga sa atong paniid, ang bugtong bisyo, serbisyo ra gyud!