Napukaw sa Tipdas Outbreak

Human sa taas kaayo nga walay pagpakabana sa katawhan mahitungod sa measles vaccine, nahigmata na ang mga tawo karon sa peligro nga mamugna sa balatian.

Kini human gideklarar sa Department of Health ang measles outbreak lakip na ang tibook Central Visayas.

Mao lang diay kini ang pagpanghadlok sa mga tawo aron pabakunahan ang ilang mga anak.  

Kaniadto magsakit gyud ang ulo sa mga health workers nga magsige og agni sa mga ginikanan nga pabakunahan ang ilang mga anak sa tipdas.

Kini ilabi na sa pagtumaw sa kontrobersya sa Dengvaxia nga maoy nakapalisang sa katawhan kinsa pangilogan na kun makakita og dagum sa bakuna.

Naamong ang ubang mga programa sa pagpamakuna tungod sa isyu sa dengvaxia.

Karon magdasok na ang mga tawo og adto sa mga health centers aron magpabakuna sa ilang mga anak.

Mao ni batasan sa mga tawo nga ayha na molihok kun nabutang na sa peligro ang kinabuhi sa ilang mga anak.

Hilabihan ka dako ang pagburot sa kaso sa tipdas, kun sa miaging tuig maihap lang sa tudlo ang nataptan sa tipdas, karon 200 na kapin sa rehiyon 7.

Matud sa DOH nga 2014 pa kuno mikunhod ang gidaghanon sa mga tawo nga nagpabakuna ug misamot sa pagbuto sa dengvaxia.

Unta kun nagpakabana pa ang mga tawo sa measles vaccine dili unta kini maabot sa sitwasyon nga gikinahanglan pa nga ideklarar ang outbreak.

Hinoon epektibo ang gihimo sa DOH tungod kay napukaw man ang katawhan sa isyu sa tipdas.