EDITORYAL - Madani kaha ni Duterte?

Karong nagsugod na ang opisyal nga pangampanya sa mga kandidato sa pagka-senador og partilista, gipaabot sa tanan kun kinsa ang opisyal nga i-endorsar nga mga kandidato sa pagka senador ni Pres. Rodrigo Duterte alang sa mid-term elections.

Pagkakaron, duha ka mga partido ang klarong gisuportahan sa pangulo nga mao ang iyahang partido nga PDP-Laban ug ang partidong gitukod sa iyang anak nga si Mayor Sara Duterte nga mao ang koalisyon nga Hugpong ng Pagbabago. Ang duha ka partido adunay kaugalingong mga kandidato pagka-senador nga gisuportahan pareho. Mahimo rang mamili si Duterte gikan sa iyang partido ug gikan sa partido sa iyang anak.

Si Duterte nakakuha og 16 milyones nga botos sa nakalabay nga eleksyon, dakong pangutana karon kun kini bang mga nisuporta kaniya mosuporta ba pud sa mga kandidato unya nga iyang i-endorsar?

Sa inisyal nga gipangtuboy niya sa pagka-senador adunay kwestyonableng rekord tungod sa kasong plunder. Ang pangalang Duterte makapausab ba kaha sa baruganan sa mga botante bisan og kwestyonable ang kaligdong sa kandidatong iyang gituboy?

Usa sa gikasilagan ni Duterte ang mga kawatang kawani sa gobiyerno wala ba kaha ni masimang sa iyang baruganan?

Hinuon dili si Duterte ang mopadaog o mopapildi aning mga kandidatoha kondili ang mga botante. Ang mga gahom wala kang Duterte kondili naa sa mga tawo.

Dili naman lisod karon kun unsaon pagsubay sa background aning mga kandidato tungod kay aduna may internet. Ayaw lang gyud sa social media tungod kay sagad niini may bulok personal interest sa nag-post niini.

Daghang websites nga mahimong tan-awon ilabi na sa mga lehitimong media outlets daghan silang mga karaang mga balita. Maayong ang tanang kandidato maoy tan-awon ug dili lang kadtong mga giendorsar sa pangulo kay siguradong may makat-onan usab nga bag-o gikan sa mga taga oposisyon.

Pinaagi sa maong mga backgrounds, may giya na ang botante kun kinsa ang angay ug dili angay botaran.