Kamay na bakal dapat para sa batas trapiko
ANO ang problema sa isip ng Pilipino kaya hindi ito mapasunod sa batas trapiko at kortesiya sa kalsada? Masdan ang sitwasyon sa kalye nang 15 minuto, at hindi na mabibilang ang mga paglabag at kabastusan:
Merong kumakaskas at nagsi-zigzag sa lanes. Nagbababa at nagsasakay ng pasahero sa gitna ng kalye. Idinadaan ang motorsiklo sa bangketa para umiwas sa trapik. Pumaparada kung saan bawal. Bumubusina at nagre-rev-up ng makina sa tapat ng korte, eskuwelahan, at ospital. Mausok at maingay ang tambutso. Humihinto sa ibabaw ng pedestrian lane o sa loob ng yellow box. Hindi magbigay sa mga lumiliko o sa bumbero, ambulansiya, at pulis. Nagmamaneho nang lasing, nakadroga, o inaantok. Nagti-text o nanonood ng video sa gadget habang nagmamaneho. Mabagal ang andar sa fast lane. Hindi nagsisindi ng ilaw at windshield wipers sa gabi o ulan. Madilim ang window tint. Nambu-bully ang malalaking sasakyan -- bus, truck -- sa maliliit. Maliit na sasakyan -- motorsiklo, tricycle -- na pasingit-singit mula sa kanan. Jeepneys na may sakay sa bubong, bus na umaapaw ang pasahero sa estribo, habal-habal tricycle na mahigit lima ang sakay. School bus na walang marka. Colorum na jeepney, bus, taxi. Ride hailing (Grab) na labis ang singil, tumatanggi o hindi hinahatid ang pasahero. Public utility driver na naka-shorts, sando, at tsinelas lang. At marami pang iba.
Paulit-ulit ang paglabag at pambabastos sa kalsada dahil kulang sa pagpapatupad ng batas. ‘Yan ang sabi ni Engr. Bert Suansing, secretary general ng Philippine Global Road Safety Partnership at dating hepe ng Land Transport Office. Inehemplo niya na 301 ang nahuli na drunk driving sa Metro Manila nu’ng Enero-Agosto 2018. Tanong niya: kinasuhan ba sila, kinulong at minultahan? Kung nababalita na masaklap ang sinapit ng mga traffic violators, matatakot at titino ang mga nagmamaneho. Simple!
- Latest
