Gisabotahi ang pakisusi?

Gimando na ni Chief Superintendent Debold Sinas ang imbestigasyon sa talinghaga sa pagkawala sa mga dashcam footages sa sakyanan ni kanhi Cebu City assistant prosecutor Mary Ann Castro atol sa pag-ambush niini dili pa lamang dugay.

Gitahasan karon sa direktor sa Police Regional Office-7 mismo si Senior Superintendent Royina Garma, ang direktor usab sa Cebu City Police Office, sa pagpangulo sa maong imbestigasyon. Importante kaayo kadtong mga footages sa pakisusi sa otoridad sa pagpatay kang Castro.

Kini human nga mireklamo ang pamilya sa prosecutor atol sa usa ka press conference ngano nga na-delete ang footages sa dashcam atol sa maong insidente. Matud nila nga naandan na ni Castro nga mo-on gayud sa dashcam atol sa mga lakaw niini.

Niini nga development sa  maong kaso, mora’g daghan na hinuon ang nagduda sa sirkumstansiya sa pagpatay sa kontrobersiyal nga prosecutor, kansang katapusan nga assignment mao ang lalawigan sa Masbate.

Kun atong hatagan og gibug-aton ang kaso, daghan ang makaingon nga mora gayud og tinuyo ang pagpapas sa maong footages. Kun tinuod kini, unsa kahay rason nga nagpaluyo niini. Kini aron ba kaha nga mapapas usab ang krusyal nga ebidensiya sa pagpatay kang Castro?

Kun tuyo nga wad-on gayud ang maong footages sa maong insidente, klaro nga panglawgaw kini sa imbestigasyon sa kaso. Mao na nga dili nato ibaliwala ang ideya nga basin adunay pipila nga gusto gayud nga mosabotahi sa dagan sa pakisusi sa maong kaso.

Apan ang dakong pangutana karon, kinsa man ang nagpaluyo sa pagpapas sa footages sa dashcam ni prosecutor Castro? Ug kun gituyo kini, unsa may intensiyon sa mga mimaniobra niini? Aron ba paglihis sa imbestigasyon sa kaso sa iyang pagpatay?

Hinuon atong nasayran nga mga pulis lamang ang daling miresponde sa lugar human nga gi-ambush si Castro. Ug nagpasabot kini nga sila lamang ang nakakuykoy sa mga ebidensiya sulod sa crime scene. Apan ngano man nga napapas ang maong footages? Angay sila nga manubag niini.