Konsensya nawala na

“Namatay?..... aw nalambigit seguro sa illegal drugs? .... mao kini ang ang nag unang reaksyon sa mga tawo kon makadungog nga adunay mabiktima sa pagpamusil.

Ma personal man o sa social media mao gyud ang mabasa nga reaksyon sa mga post nga adunay gipusil sa usa ka dapit.

Mas grabe nga reaksyon kanang murag wala lang ang mga tawo kay nakadawat na nga ingon niini na ang naandan.

Gani ang uban medyo madismaya pa kun ang biktima nabuhi pa kay murag naanad na nga pusil-patay gyud ang resulta.

Anaa usay malipay nga nadayonan gyud og kamatay ang mga napusilan labi na kun nalambigit sa illegal nga drugas.

Daghan ang naigo niini apan makapanglimbawot sa balhibo nga sa usa ka sibilisadong katilingban, nahimong normal nalang alang sa uban ang usa ka barbaro nga binuhatan.

Murag nibalik kita sa panahon nga wala pa mopatigbabaw ang balaod diin ang mga tawo maoy mangunay sa pag sentensya sa ilang mga kontra.

Alang sa mga tawo nga mahukmanon kinsa dayon lang og layat sa ilang konklusiyon nga moingon “maayo nga gipatay kay nalambigit man diay sa dautang binuhatan” hunahunaa ug ibutang ang inyong tiil sa mga tagtungod unsa kaha inyong bation?

Dili lalim, namatyan na, gipatay pa gyud ang nahabilin nga pagkatawo sa biktima ug ang dungog sa iyang pamilya.

Asa naman ang atong konsensya? Anaa pa ba? Susihon kaha nato basin nawala na o namatay na usab ang atong konsensya.

Dili nato tugotan nga mawagtang sa hingpit ang atong konsensya ug ipatigbabaw gihapon ang atong pagkatawo.