Nganong nabiyaan ang Camotes
Kun maaprubahan ang balaudnon nga mopa-titulo sa dakong bahin sa isla sa Bantayan, nga labihan katungason kay mo-adjourn na sunod semana ang Kongreso alang sa piniliay sa Mayo, mauwahi ang isla sa Camotes.
Kay wa pa mahingpit ang pagsusi sa tibuok Camotes aron pag-ila sa mga luna nga mahimong titulohan.
Kini tungod kay samtang hagbay rang nahuman sa Department of Environment and Natural Resources (DENR) ang General Management Plan (GMP) alang sa tulo ka lungsod sa Bantayan, wa pa gyud mahingpit hangtod karon ang GMP alang sa upat ka lungsod sa Camotes.
* * *
Mas abtik ba lang si Kongresista Benhur Salimbangon sa ikaupat nga distrito nga maoy nahimutangan sa Bantayan sa pagsige og apura sa DENR ug sa Malakanyang?
Di ba sama ka-apurado si Kongresista Red Durano, gawas nga di siya sama kasikit sa Malakanyang karon, sa ikalimang distrito nga maoy nahimutangan sa Camotes?
Lahi ang panglantaw sa tagduma sa National Housing Authority (NHA) sa Sugbo nga si Engineer Constancio Anteniero:
Di ang duha ka kongresista kondili ang kalainan sa mga kontraktor sa duha ka isla maoy hinungdan nga nag-una ang Bantayan kay sa Camotes.
* * *
Gipahibawo ni Anteniero sa Arangkada sa DYAB Abante Pa, Bisaya nga labihang daghana sa mga kontraktor nga nagtinguha sa pagtukod sa kabalayan alang sa mga biktima sa bagyong Yolanda sa Bantayan. Ug sila maoy nagsiging-siging sa kadagkoan sa DENR paghingpit sa GMP.
Sa pikas nga bahin, mapanagan-on ang mga kontraktor sa NHA pag-apil sa mga subasta sa kabalayan sa relocation sites sa Camotes, labi na sa lungsod sa Pilar, tungod sa kalayo ug sa kadako sa gasto paghakot sa ilang ekipo ug materyales.
* * *
Matud ni Anteniero itugyan sa NHA ang tahas pagtukod sa kabalayan sa Camotes ngadto sa mga munisipyo.
I-download ang pundo sa NHA ngadto sa San Francisco, Tudela, Poro ug Pilar ug ang lokal nga mga opisyal nay makiglambigit sa lokal nga mga kontraktor.
Samtang nakabuylo nang Bantayan, wa pa kasugod ang NHA sa Camotes.
Di maayong timaan sa ilang paningkamot pagtuman sa lugway nga gipahamtang ni Presidente Rodrigo Duterte nga kinahanglang matukod nang tanang 22,423 ka kabalayan sa amihanang Sugbo sa Disyembre karong tuiga.
* * *
- Latest
