Abu Sayyaf na usab

Tanang tudlo nagpunting karon sa bandidong Abu Sayyaf nga maoy responsable sa duha ka dugoong pagpamomba sa usa ka simbahan didto sa Jolo sa Sulu mga mipatay og 20 ka tawo, lakip na ang unom ka sundalo kaniadtong Domingo sa buntag.

Trademark sa maong grupo sa mga terorista ang maong klase sa pagpamomba.

Gani sila maoy responsable sa pipila ka grabe nga pagpamomba sa nasud, ilabina didto sa Mindanao nga mikalas sa kinabuhi sa gatusan ka mga inosenteng sibilyan.

Balwarte sa Abu Sayyaf ang dagkong kalasangan didto sa Sulu ug ang silingan nga mga probinsiya sa Basilan ug Tawi-Tawi.

Mao na nga dili gayud nato malingi ang atong ulo pagsuhid pa og laing mga suspek sa maong ngilngig nga pagpangatake.

Daghan ang nakaingon nga piang na ang Abu Sayyaf gumikan lagi sa subsob nga kampanya sa kagamhanan batok sa bandidong grupo.

Gani mideklara ang otoridad kaniadto nga minos na ang kapabilidad sa maong mga bandido tungod kay wala na silay maayong liderato ug nga nagkaubos na ang ilang mga sakop.

Apan niining pagpamomba atol sa misa sulod sa cathedral didto sa Jolo, morag aduna pay kapabilidad ang Abu Sayyaf nga molusad og dagkong mga pagpangatake.

Sa ato pa, dakong buhi pa ang maong grupo ug andam pa nga mosungag sa otoridad.

Hinuon, sa laing bahin, angay lamang nga mohimo og dakong imbestigasyon ang kagamhanan sa maong pagpamomba.

Angay gayud nga susihon niini ngano nga nakasulod pa ang mga dautang elemento sa cathedral dala ang mga bomba.

Daghang pangutana nga angay matubag sa maong insidente.

Usa na niini kun aduna bay dako nga lapso ang militar ug kapolisan sa ilang pagpatuman sa siguridad sa Jolo, ilabina duol sa maong simbahan nga klaro nga target gayud sa mga terorista.

Hinuon klaro nga adunay dako nga sipyat ang otoridad kabahin sa pagpatuman nila sa siguridad niadtong higayona.

Ug angay lamang kini nga lilion sa kagamhanan aron nga makorehian ang unsa mang kapalpakan ug dili na masubli pa ang dugoong hitabo.