Natulog baa ng Dios?

Bisan balay sa Ginoo wala palabya, gibombahan atol pa gyud sa Misa nga misangpot sa pagkakalas sa 20 ka mga kinabuhi sa Mt. Carmel Cathedral sa Jolo, Sulo.

Ingon nalang ba gyud ka dautan ang nagpasulabi sa mga responsable sa naasoyng pagpamomba?

Sa ilang gibuhat dili sila matawag nga tawo kay ang tawo adunay kasing kasing nga maantigong malooy sa isig ka tawo.

Sila ang ang mga yawa nga nagbayhon nga tawo nga nagsabwag og kasakit sa mga nilalang sa Ginoo.

Sa habig sa atong gobiyerno, kumusta man ang intelligence nga gipundohan og dakong kantidad? Nganong nalutsan man sila?

Gipangayoan karon sa Malacañang og pagpasagot ang Department of National Defense unsay nahitabo sa ilang intelligence.

Giangkon sa mga otoridad nga nakadawat sila og intelligence report sa wala pa mahitabo ang pag pamomba busa aduna nay mga sundalo nga nakabantay sa simbahan.

Apan nalutsan gihapon sila tungod kay naa man usay pamaagi ang mga terorista nga makalusot ang ilang dautang plano ug milampos gyud sila.

Ang nahitabo sa simbahan sa Jolo dili layo nga mahitabo sa bisan asang suok sa nasod busa dili angayan nga mokompyansa.

Kung mahimo lang rekisahon gyud ang tanan nga mosulod sa simbahan kay basin naay magpakarong ingnon nga magdala og halad apan naa diay bomba nga gisulod niini.

Dili lang sa simbahan kon dili sa tanan nga mga establismento himoon ang pagtan aw sa mga butang.

Sa mga mall paablihan man sa mga guard ang bag, apan taphaw ra man ang ilang pagtan aw, kon naa sa ilawom ang bomba aw makalusot gyud.

Karon nga anaa na sa yuta ang yawa, angayan pahugtan pa nato ang pag bantay pinaagi sa hugot nga pagtoo sa Ginoo nga maoy bugtong alkontra sa mga dautan.

Mahimong nilampos sila sa pagtisok sa kadautan apan duna gihapon silay kinutoban.

Seguro ang uban makapangutana kun natulog ba ang Dios nganong gitugot niyang mahitabo sulod mismo sa iyang templo? Wala matulog ang Ginoo duna lang siyay mensahe nga gustong ipaabot sa mga nilalang.