ID sa Senior, gitahod na

Bisan sa mga subdibisyon, nakaingon ko nga ang The Freeman Banat News, may mga suki nang tigbasa. Kini nahibaw-an dihang si Sir Domingo Q. Chaves Jr., kanhi OSCA Head, mitawag nako ug mipabuhagay sa iyang kaikag dihang gipahibalo siya sa security guard sa ilang subdibisyon nga na-starring kuno iyang ngalan pagbuto sa akong artikulo nga gititulohan og: ‘SENIOR ID, WALA TAHORA’.

Kini nagpasabot lang nga guwardiya sa ilang subdibisyon mag-aray pud diay’g TF Banat News.

Matud ni Sir Doming, dili na diay kuno siya ang Head sa Office of the Senior Citizens Affairs.

Taudtaod na niya kining gibiyaan kay nag-Lupon na siya. Ug hangtod karon, bakante pa ang maong puwesto.

Bilib kong Sir Doming.

Kay bisag wala na siya didto, gigiyahan gihapon ko niya sa hustong paagi unsaon nga maaksiyonan dayon kadtong tigbantay ug tigdumala sa parking area sa usa ka department store, kinsa wala gyud motahod sa Senior Citizen ID nga gitunol nako.

Mao kadtong giingnan ko niya nga mopayil og formal complaint addressed to OSCA for clarity purposes sanglit sukad, bisag asa kong business establishments nga moparking libre man. Ug kini rang tindahana ang naningil!

Mipasalig siya nga aksiyonan lagi kuno ni dayon, diin delikadog makabayad og penalty, mapriso ug puwede pang masira ang tindahan kon mamatud-an nga wala nila irespeto ang OSCA Senior ID.

Apan may pagkatubig akong kinaiya. Dili kalayo. Akong pasensiya taas.

Moto, nga giesplikaran ko si Sir Doming, nga mosulay lang ko’g adto pag-usab sa maong department store. Kun paninglan gihapon ko’g parking fee sa ilang parkinganan, aw…diha na nako buhaton ang imong gitudlo.

Sukad napublikar ang ‘SENIOR ID WALA TAHORA’ dinhi sa panid sa Opinyon, wala na ko ganahi moadto sa nahisgotang department store.

Apan human kami magkaestorya ni Sir Doming, nahanaw ang akong pagpangluod ug maoy mipuli ang tumang kadasig sa pagbalik aron susihon kon maningil ba kini gihapon.

Karong adlawa, Enero 23, miadto ko. Ug otomatik nga gipangutana ang cashier kun pabayron pa ba nila og parking fee ang mga senior citizens? 

Haskang dalia nakatubag sa mga seniors: “Wala na, Sir, uy! Hagbay ra nilang gibalik ang Free Parking.

Nag-ayo’g makamulta’g masirad-an!”