Representasyon sa mga senior citizen sa mga legislative bodies

Niining nagsingabot nga eleksyon, atong gipanghinaut nga malakip sa concern sa mga kandidato pagka-Senador ug pagka-Kongresista, ang dugay nang gihandom nga makalingkod kita diha sa mga legislative bodies sa mga LGUs, sama sa mga kapitan sa barangay ug sa sangguiang kabataan. 

Hinumdoman nga ang Senate Bill 1418 ni Senador Loren Legarda “seeks to provide representation of the elderly in every Sanggunian and local special bodies in the LGUs.” Tinguha ni Senador Legarda nga sama sa mga kapitan sa barangay ug sa sangguniang kabataan, ma-represented usab unta ang mga senior citizen diha sa mga sanggunian sa mga local government units.

Sayo niini, kun wa ko masayop, si Kongresista Arthur Yap sa Bohol, mipasaka usab og samang balaudnon sa Lower House, apan sama sa nahitabo sa Senado, wala kini tagda sa ubang mga Kongresista.

Ambot ngano nga alang sa atong mga magbabalaud, wa kinahanglana ang mahimo untang kontribusyon sa mga senior citizen sa natad sa pangbalaud sa mga LGUs.

Recognizing sa wisdom ug katakos sa mga senior citizen, si Loren nagkanayon: “Our senior citizens deserve to enjoy a full and happy life. It is not enough that we make laws and policies for the elderly.

“What we must do is to allow them active participation in nation-building, particularly  in policy-making and local legislation, so that they themselves can push for the institionalization of programs that would address their special needs and concerns.”

Sakto kaayo si Loren. Daghan kaayong matampo ang mga senior citizen in nation-building. Nganong di man ta kamao ini? Nganong mas kamao man kay kanato ang kabataan? Puno kita sa kasinatian nga wala sa uban.

Sama sa mga retired regional directors ug kadagkuan sa NBI, sa kasundalohan ug kapolisan, sa COA, NEDA, Comelec; mga retired school principals ug superintendents; nga bank managers, ug ubang mga buhatan both sa  publiko ug pribadong mga institution.

Dili kaha ni sila mo-qualify paglingkod diha sa mga sanggunian panglalawigan o sa panglungsod? 

Diha puy mga sugyot nga mugnaon ang Sangguniang Senior Citizen sama sa Sangguniang Kabataan. Unya, mosalmot kita sa eleksyon sa barangay pinaagi sa pagpili sa buot natong ipadala isip senior citizen representative diha sa mga legislative bodies sa lalawigan, dakbayan ug kalungsoran.

Sa ako nang giingon, hinaut nga kining mga kandidato pagka-sakop sa Kongreso, labi na ang kaugalingon natong mga piliunon dinhi sa dakbayan ug lalawigan, makahunahuna usab niini.