EDITORYAL - Andam na ba ta?

Andam na ba ang Pilipinas ilabi na ang gobiyerno pagtabang sa mga batang makasala sa balaod aron sila magbag-o ug mapuslan sa umaabot nga panahon?

Aduna na bay tarong nga mga pasilidad ang matag rehiyon o probinsya nga kompleto sa mga kinahanglanon, mga social workers, budget ug uban pa aron masigurong magbag-o kining mga batang masalbar gikan sa mga krimen?

Kun ang Juvenile Justice Act gani nga dugay nang napasar ug karon gusto na sab amendahan, wala makapatukod og paigo nga gidaghanon sa mga pasilidad alang niadtong mga Children in Conflict with the Law (CICL), unsa may garantiya nga maatiman sa gobiyerno ang pagkakaron?

Dihang napasar ug naamendahan ang karon gitawag nga Republic Act 9165 o ang Comprehensive Dangerous Drugs Act, gimando nga kinahanglang lahi ang prisohan sa mga durugista.

Kinahanglan sab magtukod og mga drug rehabilitation centers alang sa mga drug addicts. Apan unsa may nahitabo karon? 

Kuwang ang mga drug rehabilitation centers ug gisagol ra ang mga durugista sa mga piniriso sa ubang krimen.

Ang resulta, ang masalbar pa unta nga drug users nahimo nang drug pushers hangtud nalambigit na sila sa uban pang krimen ini og gawas.

Kadtong ordinaryong esnatser o kawatan nga nasagol sa mga durugista, nangatakdan ug nahimo na sab nga drug users ug kun makagawas na sa prisohan mga drug pushers na kay may koneksyon naman sila sa mga sindikato sa drugas gikan sa prisohan.

Karon gusto na usab paubsan ang criminal liability sa mga bata gikan 15 anyos himuon nang 9-anyos, parehason ra ba gihapon nila sa nahitabo sa mga durugista o sa mga CICLs?

Mismo ang Juvenile Justice and Welfare Council sa gobiyerno miangkon nga aduna lamang 63 ka Bahay Pag-asa nga pasilidad sa tibuok nasud, lima niini wala na mag-operate. Asa man dad-on ang 9-anyos nga makasala kun maamendahan ang balaod, isagol sa mga durugista og mga kriminal sa mga prisohan?