Kasabutan alang sa boluntaryong pagpahawa sa yuta

Dear Atty. Divine,

Duna koy yuta nga gihatag sa akong papa ug nakapangan na kini sa akoa. Last year namatay akong papa.

Apan sa wa pa namatay akong amahan, dunay among paryente nga iyang gitugutan nga makapuyo sa maong yuta ug nagtukod kini og balay nga light materials.

Ako ni karong gireklamo sa barangay kay gusto nako siyang papahawaon but mihangyo siya nga tugutan una siyang makapuyo samtang wa pa nako gamita ang property.

Andam daw siyang mopirma og kasabutan labot niini. Ang akong pangutana kun okay ra ba kun ako siyang papirmahon og kasabutan sa barangay?

Daghang salamat.

Mike

* * *

Dear Mike,

Mamahimo ra nga  magpirmahanay mo og kasabutan sa barangay ug ibutang isip kondisyon nga mobulontaryo siya sa pagpahawa sa higayon nga imo nang gamiton ang property.

Ilakip sab nimo sa pagbutang nga siya ray mogasto sa iya unyang pag-transfer ug hatagan nimo siya og duha ka buwan sa pagpangita og kabalhinan ug adto kini ninyo pirmahan sa barangay.

Apan sa higayon nga imo nang gamiton ang yuta ug magdumili na siya sa pag-vacate sa property then mapugos gyud ka sa pagdangop sa korte aron sa pagpapahawa kaniya.

Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.