EDITORYAL - China, role model?

Hilas ug kataw-nan kaayo ang pangangkon sa China nga usa kini ka “role model” sa kalibotan kun maghisgot pagtahod og international laws. Ang pamahayag gibuhian sa tigpamaba sa foreign ministry sa maong nasud atol sa pagduaw sa ilang tulo ka barkong panggubat sa Manila kagahapon.

Apan ang iyang pangangkon layo ra kaayo sa tinud-anay nga kahulogan sa iyang pamahayag nga nag-ingong : “China develops its national defense strength independently… commensurate with the growth of its national power, the purpose of which is to better safeguard its own sovereignty, security and development interests and maintain global and regional peace and stability,” matud pa sa maong opisyal nga si Hua Chunying sa press conference.

Sa iyang pamahayag wala siya maghisgot og kaayohan para sa tanan ilabi na sa mga silingang nasud kondili nagpakusog sila sa ilang pwersa aron bantayan ilang soberiniya, seguridad ug paglambo sa ilang interes. Ang pamahayag nga “maintain global and regional peace and stability” dakong bakak tungod sa ilang gibuhat karon sa West Philippine Sea diin ilang gitukoran og pito ka mga artipisyal nga mga isla ang mga teritoryo sa Pilipinas.

Tungod kay bisan wala tuod sila mopabuto og armas, apan gisiko-siko ug gituok nila ang Pilipinas aron makuha ang maong mga teritoryo.

Atubangan mismo sa mga mata sa mga opisyales sa Pilipinas apil na si Duterte gikompleto sa China ang ilang ambisyon sa WPS.

Matud pa sa mga nanggawas nga balita gipamutangan na nila og mga anti-ship cruise missiles, surface-to-air missile system ug electronic jamming equipment ang kaniadto Fiery Cross, Mischief ug Subi Reefs nga gihimo nilang artipisyal nga mga isla.

Wala sab tahora sa China ang Arbitral Tribunal nga nag-ingon nga ekslusibong panagatan sa mga Pilipino ang pipila ka bahin sa giilogang teritoryo, ug dunay mga report nga pagpanghasi sa ilang coast guard sa mga Pilipino didto ug uban pa. Sa asa mang dapita kaha ang gipasabot sa China nga sila ‘role model?’