National ID huwag tutulan
TULOY na tuloy na raw ang implementasyon ng kontrobersyal na National ID System. Matagal na itong tinututulan ng marami dahil pagsaklaw umano sa right to privacy. Ngunit iyan ang trend o kalakarang umiiral ngayon sa buong mundo. Alangan namang magpaiwanan tayo at magpakakulelat sa pag-asenso.
Sa tingin ko naman, ang mga tututol ay yung mga pugante ng batas at mga kriminal na nagkukubli sa kadiliman. Ngunit para sa karamihan ng mamamayan, malaking tulong ito dahil isang ID na lang ang kailangan para sa ating mga transaksyon.
Mababawasan ang mga masalimuot na hassel na requirement sa mga transaksyon sa gobyerno tulad ng pagkuha ng passports o pag-apply sa trabaho. Puwedeng tumutol dito iyon lamang may criminal records at nagtatago sa batas.
Kamakailan ay nagkaroon umano ng data breach sa pagkuha ng passport at may mga nangangamba na baka mangyari uli ito sa pagpapatupad ng National ID System.
Pero normal ang mga ganyang pangyayari sa cyber age na maagang namang naaaksyunan ng teknolohiya. Nagbabago ang daigdig at kung hindi makasabay ang bansa sa mga pangyayaring ito, mapag-iiwanan tayo.
Sabi ng Malacañang, wala nang atrasan sa implementasyon ng batas na ito. Tama naman. Panahon pa ng administrasyong Cory Aquino ay panukala na ito pero hanggang ngayon ay hindi pa naipatutupad. Wala kasing political will ang mga nagdaang gobyerno para sumalungat sa tinig ng maraming mamamayan.
Naniniwala ako sa demokrasya. Ngunit hindi palaging tama ang public opinion at madalas ay pumapalpak din. Kaya nga may gobyerno tayo upang magdesisyon sa mga aspetong hindi kayang desisyunan ng mamamayan.
- Latest