Panahon sa Eleksyon

Election period na diin gisugdan niadtong Enero 13 pinaagi sa pagpahibalo sa katawhan sa mga angayan ug dili angayan nga buhaton sulod niining panahona.

Caravan ug rekorida ang gihimo sa COMELEC ug PNP aron makakuha gyud sa pagtagad sa mga tawo sa bisperas sa Enero 13.

Usa sa gipanghimug-atan sa Comelec ang gun ban alang sa tanan bisan kadtong adunay lisensya o lehitimo nga gun owner.

Gidili na ang pagdala niini gawas sa pinuy-anan tungod kay gisuspenso man ang permit to carry firearms.

Apan mahimo gihapon katugotan kadtong adunay permit gikan sa buhatan sa Commission on Elections sa kaulohan.

Naglakip kini sa mga security guards, mga politiko nga adunay hulga sa kinabuhi apan gikinahanglan gyud nga aduna silay pagtugot kay kun wala mag-atubang sila og dako nga kalapasan.

Subsob ang pagpahigayon sa kapolisan sa ilang checkpoints nga posibleng makaani og negatibong reaksyon sa mga tawo ilabi na kadtong mga bagulbolan nga dili gustong malangan.

Bitaw gikinahanglan nga motuman gyud ang tanan kun unsa man ang nalatid nga lagda.

Aron dili malangan, mo cooperate dayon kay dili man sad siguro mohimo ang kapolisan og mga lakang nga makabutang sa ilang trabaho sa alanganin.

Walay angayan ikahadlok ang mga tawo kay gipaniguro sa PNP nga tahoron nila ang tawhanong katungod sa katawhan.

Apan hangyo usab nila nga magrespetohay usab tungod kay igo ra man sila nga nagpatuman sa balaod.

Ang mahadlok kadto ra sigurong dunay gitagoan nga kontrabando kay segurado gyud nga mahasol gyud ang ilang kinabuhi.

Sa mga kandidato, bisan election period na apan wala pay campaign period maong matngon gyud kay mahimo na diay kamong gukdon karon kun maguna- una kamo sa pagpangampanya.

Sa Marso 29 pa ang kampanya sa lokal ug Pebrero 12 sa nasyonal, paabota na lang, apan kasagaran hagbay ra man nangampanya. Pastilan!