Eleksiyon period

Sugod na ang eleksiyon period niadtong adlaw nga Domingo, Enero 13 ug mahuman kini unya sa Hunyo 12 buot ipasabot balig unom (6) ka buwan ang eleksiyon period.

Ang eleksiyon period lahi ni sa campaign period. Ang campaign period nasulod sa eleksiyon period ug mubo ang iyang gidugayon kun itandi sa eleksiyon period unya magdepende usab kini sa posisyon, nasudnon ba o lokal.

Ang mga kandidato sa lokal nga posisyon gitugotan lamang sa pagpangampanya sulod sa 45 ka adlaw gikan sa Marso 29 hangtod sa Mayo 11, 2019 samtang ang mga kandidato sa nasudnon nga posisyon gitugotan lamang sa pagpangampanya sulod sa 90 ka adlaw gikan sa Pebrero 12 ngadto na sa Mayo 11, 2019. Ang eleksiyon ipahigayon pagka Mayo 13, 2019.

Tungod sa pagsugod na sa eleksiyon period, gisugdan na usab sa pagpatuman lukop nasud ang pagdili sa pagdala ug paghupot  og armas bisan pa og kini lisensiyado gawas lang kun adunay pagtugot sa Commission on Elections o Comelec. Gipatuman na usab lukop nasud ang pagpahigayon og checkpoint.

Aron malikayan ang abuso sa pagpahigayon og checkpoint, ang balaud nagbutang og mga patakaran nga maoy sundon sa mga polis ug ubang law enforcement units nga magpahigayon og checkpoint.

Ang pipila niini mao nga ang checkpoint himuon lamang sa hayag nga dapit, naka uniporme ang naghimo sa checkpoint ug dili magtaptap sa ilang dagway. Dili sila pwede nga mangabli sa compartment sa sakyanan ug u-box sa motorsiklo.

Dili pwede nga mangapkap. Buot ipasabot, sa checkpoint ang gitugot - VISUAL lamang. Sa tinamban nga pagsabot, pwede silang manglili pero dili sila pwede nga manghikap.

Manghinaut lang ko nga pinaagi niini makabaton kita og hapsay, linaw ingon man tinuod nga resulta sa eleksiyon o piniliay. Aron wala nay patay ug reklamo nga gitikasan sa piniliay.