Gakamang nga Hustisya

Justice delayed is justice denied, mao kini ang sagad nato nga madunggan ilabi na sa mga tawo nga nakasinati niini.

Kini gumikan sa ka hinay sa paglihok sa sestima sa hustisya sa nasod o wala gyud molihok.

Kamatuoran niini ang nagdasok nga mga binilanggo sa mga jail facility diin kada adlaw adunay masulod ilabi nga kusog kaayo ang dakop nunot sa kampanya sa illegal nga drugas.

Daghan ang mosulod apan ambot lang kun dunay mogawas tungod kay wala may movement ang mga kaso nila.

Niadtong niaging semana nakaadto ko sa holding cell sa Cordova Police Station diin nagdasok na ang mga piniriso.

“Temporary permanent” ingon niini ang sitwasyon sa mga piniriso kay unta temporaryo nga isulod sila ug i-remand unta sa CPDRC, apan dili man modawat kay daghan naman usab kaayo ang mga binilango didto.

Nahingangha ako dihang nasayran nga naay usa ka piniriso nga duha na ka tuig anaa sa detention cell diin sulod niining panahona wala pa gyud ma-hearing ang iyang kaso bisan ka usa ka higayon.

Siya ug ang iyang pamilya wala masayod nganong ingon niini ang sistema kay sige lang og ka postpone ang hearing.

Laing binilanggo sulod na sa walo ka buwan sa prisohan apan wala pa gyud ma-arraign o mabasahi sa iyang kaso.

Pastilan maabtan nalang sila og siyam siyam o madunot na sila sa prisohan dili pa maka first base ang ilang kasong giatubang.

Wala pa gani nakasugod paglihok ang kaso, mahuman na seguro nila ang sentensya sa ilang kaso.

Common denominator niining maong mga binilango pulos walay ikasarang o walay kabangkaagan unsaon pagpadali sa ilang kaso o asa moduol.

Bisan tuod og mga sinumbong o suspek sila sa krimen apan aduna gihapoy katungod sa speedy trial.

Kun sad-an madugta sa bilanggoan, apan kon inosente buhian aron maluag luagan ang bilanggoan.

Suntok sa buwan kini tungod kay gakamang gyud ang atong hustisya.