Kung ano ang puno, siya rin ang bunga
MAKIKITA sa itsura ng bunga kung anong klase ang puno. Kung ang dahon ay may butlig-butlig o bukol-bukol tulad ng sa puno ng santol, may diperensya at problema ang puno.
Sa isang exclusive interview sa telebisyon ng kilalang news anchor sa isang higanteng network, humingi ng paumanhin ang magulang ng batang bully sa Ateneo. Nakiusap ang nanay na intindihin ang kanyang anak dahil bata at wala pa ito sa tamang pag-iisip.
Tanong ko, anong klaseng bata? Kulang-kulang? Kulang sa pag-iisip o kulang ang magulang?
Sa inasal pa lang nung bata at sa klase ng kanyang pagtatanong, mayroon na siyang discernment. Bugbog o dignidad? Hindi ‘yan sasabihin ng musmos at walang alam na bata - mala choice or consequence ang estilo.
Bukod dito, sinabi ng magulang na mistulang giniba ng Ateneo ang pangarap niya bilang magulang sa kanyang anak nang tanggalin ang bata sa eskuwelahan. Hindi niya na nakita ang tunay na dahilan ng problema.
Kapag tayo’y magulang, bago pumunta sa pangalawang tahanan ang bata, dapat may pundasyon. Kung ang bata ay exposed sa masamang kapaligiran, magulong tahanan at pabayang mga nangangalaga, siguradong may problema na.
Either ang mga magulang… gulpihan o murahan. O kaya naman masama rin talaga ang asal ng mga magulang. Pag madalas itong nakikita ng bata at parang kaparte na ng kanyang kinalakihan o nakasanayan ay siguradong gagayahin niya ito.
Wala namang problema, umamin ang magulang sa kanyang pagkukulang. Siguro, mas kahanga-hanga kung sinabi ng magulang na nagkulang sila sa pagpapalaki ng anak.
Hindi ka nagkamali sa pagpapalaki ng bata, bagkus nagkulang ka bilang magulang. Maaari hindi nakita habang lumalaki ang bata sa loob ng tahanan.
Nasa bahay ang pundasyon at character ng isang bata. Kasama na riyan ang ugali at asal. Kaya kung anong gawin sa iskuwelahan, may origin o pinagmulan… sa tahanan.
Diretsa ako magsalita dahil magulang din ako. At kung ang anak ko ay isang bully, makakatikim din siya sa’kin. I will say sorry at tatayo ako kung mali ang ginawa ng anak ko.
Pero kung ang anak ko ay binully at lumaban lamang… ipinagtanggol ang sarili, ako’y tatahimik. Siyempre kung tama ang ginawa bakit pa ako magpapaliwanag. ‘Di na ako dapat magsalita dahil sigurado akong maayos ang pagpapalaki ko sa anak ko. Gets n’yo?
Sa mga ganitong pesteng kaso pumapasok ang butas-butas na Juvenile Law. Ang lusot dahil bata, pake nila sa naagrabyado’t naabuso. Kaya ang krimen, paulit-ulit lang, iba-iba lang ng biktima. Tsk tsk tsk.
- Latest