Usa ray Ginoo

Mitingkag na sab ang mga dalunggan sa Romano Katoliko dihang sa iyang pagdiskurso atubangan sa mga mag-uuma didto sa Kidapawan City, North Cotabato niadtong Disyembre 29, si Presidente Rodrigo Roa Duterte miingon:

“There’s only one God. Period. You cannot divide God into three. That’s silly!”

Alang nako, walay sayop sa iyang gisulti. Tinuoray man iyang gituohan nga usa ra gyuy atong Ginoo.

Ug dili gyud mabahin sa tulo.

Actually, ang simbahan wa magtudlo nga ang Ginoo nabahin  sa tulo.

Usa ra Siya.  Aduna lay tulo ka persona: Ang Diyos Amahan, Diyos Anak ug Diyos Espiritu Santo.

Pero, ayaw liboga ang hunahuna. Kay kining tulo ka persona, Siya ra gyud na.

God is good lang gyud. Gusto Siya (God the Father) nga kitang tanang makasasala, maluwas!

Dihang Iyang nakita, nga ang katawhan naglunang na sa sala dinhi sa kalibotan, gikan sa langit, Siya nanaog ug nagpakatawo, isip anak sa Diyos (God the Son) pinaagi sa lalang sa Espiritu Santo (Siya gihapon Kini) aron adto Siya iumol sa ulay’ng sabakan ni Birhen Maria, kinsa maoy Iyang gipili nga mahimo Niyang Inahan.

Nagpakatawo ang Ginoo kay gusto Siyang mahiduol pag-ayo sa katawhan.

Diin sa inihap nga katuigan sa Iyang pagpakig-uban nato dinhi sa yuta, Iyang gitanyag ang  kaluwasan. Apan gahig ulo ang katawhan.

Lakip pariseyo ug magbabalaod,  daghan ang wala motuo Kaniya.

Nagmatuod sa nahisulat sa Balaang Kasulatan, nga walay nakaila sa Anak gawas sa Amahan.

Ug walay nakaila sa Amahan, gawas sa Anak. (Sa ato pa,  ang Amahan ug Anak, usa ra – ang Ginoo ra mismo).

Unya, dihang hapit na moabot ang adlaw nga dakpon na ang anak sa tawo aron kastigohon ug ilansang sa krus, usa ka higayon sa ilang panagtigom, giingnan Niya ang mga apostoles:

“Ayaw kamo kahadlok. Kay bisag mobalik na ako ngadto sa Langit, magpabilin ako ninyo kanunay pinaagi sa gahom sa Espiritu Santo (God the Holy Spirit)”  dayong tayhop sa Iyang palad.

Nga sa ato pa, ang Espiritu Santo, Siya ra gihapon -  ang Ginoo. Ang gihimo sa Ginoo sama ra nga katulo siya nag-ilis og sinina. Ug mabahin ba diay Siya ngadto sa tulo kun mag-ilis-ilis Siya’g personahe?

Senior Citizen

Ang pagpakabana

Unta, sa mga dagkung isyu nga atubangon sa atong nasud, kitang mga senior citizen kinahanglan manginlabot gyud ta.

Ang nakadaut lang, tungod kay wala kita mahiusa, dili kita makapadayag sa usa ka lig-on nga tingog nga morepresentar sa kapin 8 milyones ka senior citizen sa tibuok nasud.

Sa ako nang gibalikbalik dinhi, they look at us as an individual elder,  dili usa ka potent nga grupo sama sa AARP kon American Association of  Retired Persons nga atong bana-bana kapin na sa 42 milyones ka intact nga grupo.

Matud pa, ang AARP giisip nga usa sa labing influential nga lobby group sa America.

Nga ini’g tingog nila, mokurog ug mapugos pagpaminaw kanila ang gobiyerno sa America.

Kita dinhi, duna ba tay tingog? Wala. Kinsa man tuoy paminawon sa atong gobiyerno nga wa man silay madunggan nga tingog?

Usa sa mga isyu, gawas sa umaabot nga eleksyon, mao ang paghimog kausaban sa 1987 Constitution ug ang pag-shift na unya ngadto sa federal system sa panggobiyerno.

Imagine kun mangiyugpos lang ta, as if wala kitay labot sa Pilipinas, igo na lang unya kitang manghupaw, kun ang bag-ong federal charter, aduna unyay mga provision nga nahisupak sa kagustoan sa lungsod. 

Unsaon man tuod nato magpakabana ug pagpanginlabot kon wala kita masayud unsa ang atong pakabanaan ug panginlabutan?

Sa usa ka survey nga gihimo, daghan pa ang wala masayud unsa kining federalism. Ug wala usab sila masayud unsa kining Cha-Cha.

Wala usab sila masayud unsay i-amend sa 1987 Constitution, nga wala man sila masayud ug wala makasabut sa hingpit unsa ang 1987 Constitution.

Sa ato nang nahisgutan dinhi, pagkakaron, adunay duha ka draft o proposed federal charter, ang iya sa Constitutional Committee (CONCOM), ug ang resolution nga gama sa Senado ug sa Lower House.

Kinahanglan masayud kita niini, tungod kay dunay mga kalainan ang maong mga rekomendasyon sa duha ka entity.

Sa ato  nang nahisgutan dinhi, buot sa Concom nga wagtangon ang mga political dynasties, ug idili na ang pagbalimbing sa mga politiko.

Gisupak kini sa atong mga magbabalaud. Ingon man maoy ilang gusto nga wagtangon ang ilang term limits.

Sa ato pa, patuyangan sila sa ilang gusto, kun mahimo hangtud nga pul-an ug kapuyan na sa ilang pag-alagad kunohay sa lungsod.

Unsa man, mouyon ba kita niini? Daghan pang mga butang ang angay natong masayran ug angayan pakabanaan ug panginlabutan.

Ato kining ibalikbalik dinhi ning atong lindog.