Himuong legal ang habalhabal

Nanghinaut si Kongresista Raul Del Mar nga iya nang makuha sunod semana ang taho sa Technical Working Group sa Committee on Transportation sa ubos bay balauranan mahitungod sa iyang giduso nga balaudnon nga House Bill (HB)No. 6909: An Act Regulating Motorcycles-for-Hire known as Habal-habal or Angkas kaniadtong Disyembre 13, 2017.

Ang terminong Angkas giklaro sa balaudnon nga wala kini magpasabot sa usa ka mobile application.

Tumong sa HB 6909 mao ang paghatag og gahum sa mga lokal nga kagamhanan nga makapagawas og prangkisa aron ma-regulate ang operasyon sa Habal-habal .Gusto  niining maong balaudnon nga ilakip ang Habal-habal o Angkas sa Section 458 (3,vi) sa Akta Republika 7160 o Local Government Code.

Tumong sa balaudnon ang pagwagtang sa Section 7 (c) sa Akta Republika 4136 o Land Transportation Code nga nagdili sa mga motorsiklo ug ubang mga pribado nga sakyanan nga himoong pasaheroan.

Ubos sa Section 7 sa HB 6909, ang matag motorsiklo irehistro ubos niining mosunod nga klasipikasyon (a) Private passenger automobiles ug (b) Private trucks.Ang motorsiklo nga rehistrado ubos niining maong klasipikasyon dili poyde nga gamiton nga pasaheroan o kargahanan.

Kining maong balaudnon nagpabilin pa karon sa Technical Working Group sa Committee on Transportation aron itipo sa uban pod nga balaudnon nga giduso sa uban nga adunay susamang tumong.

Sa pagbalik sa session sa kongreso sa Enero 14 ipresentar na sa Technical Working Group ang ilang taho ngadto sa Committee on Transportation nga mosumitir usab niini ngadto sa Committee on Rules alang sa pag-approved niini.

Human unya makalabang sa Committee on Rules, ang natipo na nga mga balaudnon ikalendaryo na kini alang sa ikaduhang pagbasa.

Sa ikaduhang pagbasa lantugian ug hashasan ang balaudnon. Mahimong sentro unya sa lantugi ang legalidad, pagka praktikal ug kaayohan sa balaudnon.

Para nako, legal, praktikal ug makahatag og kaayohan ang paghimong legal sa operasyon sa habal-habal busa ako kining gisuportahan.