Sinulog tinggawas sa tigpahimulos

Tulo na ka sagunsong Biyernes nga pirmeng puno ang parkinganan sa Metro Cebu Cathedral labi na sa haponon nga misa.

Disyembre pa lang, taas na ang maglinyang behikulo atubangan sa main entrance nga gibitayag ‘FULL PARKING’ samtang nagpaabot kanus-a mogawas ang mga nahauna.

Samot na ning mga adlaw nga hapit na sugdan ang misa-nobena alang sa kapistahan ni Sr. Sto. Niño. Gawas nga naokupar ang mga kilid gawas sa koral sa nahisgotang simbahan, nagsugwak sab ang naghulat mga sakyanan nga gustong moparking.

Kini nagpasabot lang, nga nagkadaghan ang mga bisita nga ania na sa siyudad, kinsa gustong mosaksi sa Sinulog 2019 ug motambong sa siyam ka adlawng misa-nobena nga pagasugdan karong Enero 10 sa may ika alas 5:30 sa buntag human sa Walk with Jesus.

Hasta mga hotel, gagmay ug dagko, ning pagsulat, ubay-ubay na ang na-fully booked.

Mao nga nakadayeg ko ning Oplan Pagpangandam nga gihimo sa kapolisan, diin si Chief Superitendent Debold Sinas misaad nga mohatag og kinahugotang seguridad sa katawhan gikan sa fluvial procession ngadto na sa Sinulog Grand Parade Day.

Gani, sugod Enero 9, ang ilang alert status, isaka na nila sa full alert.

Sa nangaging Sinulog, ubay-ubay ang nabiktima sa mga tulisang adik sulod sa PUJ.

Akong misis, iyang kuwentas ug singsing gisakiyo sa armadong holdaper.

Maayo gani  kay nasalipdan ang usa niya ka tudlo sa tamdanan para misa-nobenariyo ni Sr. Sto. Niño ug ang wedding ring nga iyang gisul-ob wala maapil.

Dili kay mga hold-aper ug isnatser lang ang malipay niining mga adlawa. Hasta taxi drivers dagko kaayog ngisi.

Tungod sa kadaghang pasahero, motokar dayon ang pagkabentahoso.

Taxi meter hilabtan aron paspas modagan.

Sa bayranan sa plite, puwerting makalubag! Mamili pa gyod og pasahero nga pasakyon.

Unyag lay-an ra sa puntariyahan, bisag pasahero, nakasakay na, balibaran ug pakanaogon.

Husto ba kining gibuhat sa mga drayber, Tsip?

Kaninyo kadagkoan sa LTO ug LTFRB, mga Sir, nasayod na man ta nga panahon sa Sinulog maoy tinggawas niining tigpahimulos sa mga inosente. Ato ning pangitaag paagi bi, nga mahanaw na ning mga daotang insekto nga manguyamang panahon sa Sinulog.

Kusog kaayo ni silang mamahit, Sir, uy! Busa, angay lang hiposon.