Happy New Year!

Kumusta, wala bay naputlan ninyo og tudlo kagabii kay nabuthan sa rebentador?

Karon hinuon, dili na gyud sama kaniadto nga pwerteng daghana nga mabuthan sa mga pabuto.

Paminaw nako, mga judas belt na ang gipanggamit. Unya, kadtong migamit og ubang matang sa pabuto, wala na nila guniti samtang ilang dagkotan ang pabilo. Pero gitug-anan ko sa mga tigbaligya’g pabuto nga menos na gyud karon ang mamalit og rebentador.

Kaniadto, kusog kaayo ko nga mopabuto’g rebentador, apan karon nakaamgo ko nga usik-usik ra kini sa kuwarta.

Gawas nga usik lang sa kuwarta, peligro pa nga maaksidente ta ug ang aso nga gikan sa pabuto kun atong mahanggap, makadaot sa atong panglawas.

* * *

Gianinaw nako ang Alviola Street, kanang karsada nga nagsukad sa General Maxilom Avenue sa Barangay Carreta ug molapos didto sa T. Padilla Extension nga sakop na sa Barangay Tejero.

Pastilan, gilimpyohan na man unta kining maong karsada sa mga sakop sa Probe Team sa City Hall, apan karon daghan na usab ang nagbutang og mga tulda nga gihimo nilang extension sa ilang balay ug nakapagamay pagbalik sa karsada.

Angay na gyud nga estriktuhon pag-ayo sa Probe Team ang maong mga nagpuyo diha aron dili moabuso.

Kinahanglan ng masakpang tulda nga niabot sa karsada, sakmiton ug dili ihatag pagbalik sa tag-iya.

Ang mga motor nga giparking, pinababag pa sa karsada, ug nag-atbang sa masigka daplin. May mga lamesa gihapon nga gipangbutang.

Palihug Probe Team chief Raquel Arce, hatagi og leksyon kining maong mga abusado.

* * *

Gitug-anan ko sa kaila nako sa Barangay Duljo -Fatima nga pwerteng daghanang video karera ug moli-moli nga naapil sa pagkasunog sa kabalayan sa upat ka sityo sa maong barangay.

Wala makahakot ang mga tagdumala sa karera kay ang sunog niulbo man atol sa kaadlawon.

Apan bisan og nangasunog ang mga video karera ug moli-moli sa upat ka sitio, daghan pa gihapong mga illegal gambling machines sa ubang dapit sa barangay.

Unsaon, ang kapolisan nga ubos sa pagdumala ni Senior Superintendent Royina Garma wala man magtagad sa pagpangsakmit niining maong mga illegal gambling machines ug nagtuo ko nga gihimo nila kining gatasan.

Abtik tuod sila nga mihimo’g kampanya batok sa ilegal nga drugas, apan kiyugpos sila sa mga ilegal nga sugal.

Ambot kun unsaon ninyo pagsabot nganong wala makamando si Garma ngadto sa iyang mga sakop nga hugtan ang paghimo’g kampanya batok sa mga ilegal nga sugal.