Practice what you preach

Dili tanang pari ligdong ug buotan. Ubay-ubay, maayo tuod kaayong mosulti diha sa ilang homiliya, apan wala puy-i sa tinuoray’ng kinabuhi ang unsay gitudlo nila sa katawhan. Hinungdan, naangin intawon ang tibuok Simbahang Katoliko sa panan-aw ni Pres. Rodrigo Roa Duterte, kinsa walay prenoprenong mibulgar sa mga salawayong binuhatan sa pipila ka pari nga matud niya, maayo kaayo mamadlong, pero sa tago, labaw pud diayng badlongonon!

Niadtong bata pa mi, gitudloan gyud mi nilang Tatay ug Nanay nga magmatinahoron gyud sa pari kay sila mga pinili sa Diyos, busa sagrado’g halangdon! Mao nga human sa orasiyon o angelus, maatol gani nga makasugat mi’g pari sa dalan, mangluhod gyud mi ug moamen.

Taas kaayo ang among respeto sa pari. Abot sa langit! Gani, sa linghod kong panabot kanhi, abi ko’g ang pari,  mao na ang Ginoo, kay sama kaputi sa gisul-ob niyang sotana, wala man gyud mi nakitang buling ni mansa sa sala diha sa iyang pagpangalagad.

Apan karon? Labi na ning administrasyon ni Duterte? Ay, gipangbuksan ang tanan nilang baho, uy!

Kini walay labot sa ginagmay’ng kontrobersiyal nga mipasulabi paghari sa pagkatawhanon sa pari. Sama ning bag-o lang nahitabo, diin ang pagbunal sa pari ginamit ang karton inubanan sa masuk-anong pagpamalikas ngadto sa PWD nga dalagita, kinsa nakalimot pagpakaon sa binuhing iro sa pari, nahimong viral dili lang sa Facebook, kondili, mibaha  gyud sa pamantalaan.

Unya, napriso ra ba ang pari. Okay ra unta, kun siya nabilanggo tungod sa iyang pagpanalipod ug paglaban sa mga pulong sa Diyos kay seguradong may luna gyud siya didto sa langit. Pero, naunsa ba, nga iya man hinuon ning gikontra, uy?

Sa pagpanudlo ni Hesukristo sa iyang mga tinun-an, dihang usa kanila nangutana Kaniya, kinsay ilhong maoy kinadak-an didto sa langit, mikugos Siyag bata, gibutang sa tungatunga ug miingon: “Sultian tamo. Gawas kun magbag-o mo ug  mahisama niining bata, dili gyud kamo makasulod sa gingharian sa langit.”

Ang gipasabot nga bata mao ang mga kabos, inosente ug PWD sama niadtong gibunalag karton ug gibalikas sa pari. Pinangga sa Ginoo ang mga gagmay nga sama kanila. Apan gipasakitan hinuon sa pari.

Father, please lang, practice what you preach.