EDITORYAL - ‘Heavyweights’ sa narco-list

Dunay 77 ka mga political heavyweights sa Sugbu ug sa Autonomous Region in Muslim Mindanao (ARMM) ang giingong naapil sa narco-list ug nikandidato karong umaabot nga mid-term elections.

Ang kalihim sa Department of Interior and Local Government nga si Eduardo Año miingon nga gusto gyud siyang ipublikar ang maong mga pangalan aron makahibalo ang mga botante.

Apan ang nakaayo niini kun itandi sa unang pagpublikar sa mga pangalan nga gihimo mismo ni Pres. Duterte, buot sa DILG nga may kaso nang gipasaka batok kanila ug dalion ang pagpagawas sa warrant of arrest.

Sa samang higayon malipay usab ang katawhan kay sa unang higayon makita nila nga mahimo ra diay paspasan ang paggukod aning mga gamhanan ug impluwensyadong  mga politiko ug labaw sa tanan mahatagan og higayon ang mga gipasanginlan pagtubag sa mga akusasyon batok kanila.

Sa maong kalamboan, dili pa gyud diay angay makampante kadtong mga politiko nga nalambigit sa ilegal nga drugas nga wala pa hinganli.

Kay dili imposible nga ang kadtong mga nangadakpan na sa mga otoridad dili motug-an kun si kinsa pa ang mga nalambigit sa negosyo sa ilegal nga drugas apil na kun si kinsa ang ilang mga protektor.

Nasayran nga 93 gyud ang naa sa listahan, apan ang napulo naaresto na o napatay sa mga otoridad samtang adunay unom nga lima ka mayor ug usa ka bise mayor ang tangtangonon sa listahan kay nasuta nga wala sila malambigit sa ilegal nga drugas.

Ang tumong ni Año niini nga giyahan ang katawhan sa ilang pagbotar. Nagpasabot kini nga maimpluwensyahan ang tawo sa ilang pagbotar kun dili sila gustong ang molingkod sa ilang lungsod, probinsya o distrito drug lord o drug protectors.

Mas labing maayo kun sa pagawas sa listahan may kaso nang napasaka aron mas magiyahan ang mga botante ug walay magdudang may bulok politika ang motibo.