Supakero sa Pasko ug Bag-oong Tuig

Adunay balaod nga nagdili sa pagpabuto og mga rebentador panahon sa Pasko ug Bag-ong Tuig. Hinuon, gitugotan ang mayor sa kalungsoran o siyudad paghatag og designated places asa ug diin ra puwede makapabuto ang tawo, kinsa daw maguba ang Christmas Day and New Year celebration kondili makaaray og firecracker and wine samtang nagpaabot sa tungang gabii ning maong halandumong okasiyon. Pero pinili ra ang unsay dapat pabuthon.

Ang very concerned mayor may lugar nang gigahin alang niining matanga sa kalingawan, diin kun magdanghag ang maglingawlingaw, usahay magdalit og masulob-ong pagsaulog. Kay kun hubog na, nagtuo nga ang iyang gigunitan baso sa bino, pero ang dinuslitan na diay’ng baby dynamite. Busa, gipahibalo sa mayor ang tukmang dapit, diin adto ra himoa ang pagpabuto.

Apan sa miaging Disyembre 25, naa gyuy isog nga mipabuto sulod sa ilang subdibisyon. Okay unta, kun watusi ra.

Pero, grabeng sipaa! Nawalis gud ang sidsid sa sinina sa Mommy kay didto man motago sa ilawom ang baby. Migakos sa seksing paa nga naghilak, kay pwerteng hadloka!

Bisan sa kahugot pasidaan ni Regional Director PRO-7 Chief Superitendent Debold M. Sinas ngadto sa publiko nga dili na lang magpabuto, niay pipila gihapon ka mga suberbiyo ang misupak.

Mga gahi, kinsa walay respeto sa EO 28 ni Pres. Rodrigo!

Ug ingon sa pagahilantawan, nga managhan pa gyud kini sila pagbutho sa Bag-ong Tuig 2019. Unsaon, morag gipasagdan man lang sila sa mga polis, uy?

Tsip, timan-i. Ang daghan gikan sa diyotay. Ingon, nga ang dako gikan sa gamay.

Gipakasama ko ilang gihimo sa usa ka gamay’ng samad. Nga kun pasagdan lang ug dili dayon matambalan, basig mapareho sa sakit nga illegal drugs, diin nagsugod lang sa usa ka gamay’ng garas.

Apan kay napasagdan sa mga kamot sa balaod ug sa mga nangaging presidente sa nasod, nakalamay sa tibuok lawas sa Pilipinas ug nahimong kanser nga daw wala nay tambal nga makasalbar.

Kining adlaw sa Pasko ug Bag-ong Tuig, mailhan ang mga supakero ning balaod nga hugtanong ipa-implementar ni Tatay Digong.

Sila ang dili mahadlok mopabuto sulod sa ilang subdibisyon.

Sir Debold Sinas, mapangitaan kaha kinig nindot paagi aron sila mohunong na?